DILI, 12 jullu 2024 (TATOLI) – Komandante PNTL Munisípiu Ainaro, Asistente Superintendente Polísia Luis da Silva, dehan Departamentu Investigasaun Kriminál Nasionál konklui auto notísia ba kazu furtu agravadu ne’ebé envolve husi José dos Santos Naimori Bucar ba Ministériu Públiku Covalima (Suai).
“Sim, horseik husi Departamentu Investigasaun Kriminál mai Ainaro halo buska no apreensaun ba fatuk lulik ne’ebé komuidade nian ne’ebé Naimori rai iha nia rezidénsia, iha Hatudu dezde 2023, buska no apreensaun ne’e autoridade sira hetan rekoñesimentu husi ha’u hanesan Komandante PNTL, Munisípiu Ainaro, hafoin ida-ne’e, sira haruka auto notísia ba Ministériu Públiku Suai, tanba Ainaro iha nia área juridisaun Suai’’, Assistente Superintendente Polísia Luis da Silva hateten ba TATOLI via telefónia tersa ne’e.
Nia dehan, Naimori koopera ho autoridade seguransa durante prosesu buska no apreensaun.
“Durante prosesu buska no apreensaun ne’ebé halo iha Naimori nia rezidensia ne’e husi Naimori rasik koopera ho polísia, buat hothotu lao di’ak to’o polísia sira lori nia ba Komandu PNTL Ainaro hodi halo identifikasaun”, nia adianta.
Komandante Luis, hateten prosesu buska no apreensaun ne’ebé parte DIK Nasionál halo, hetan duni fatuk lulik ne’ebé deskonfia foti subar husi Naimori.
“Iha buska no apreensaun ne’e ekipa hetan duni fatuk ne’e iha ne’ebá no sira dada ona liña polísia tanba ne’e hanesan evidénsia ida hodi ita aprezenta ba Ministériu Públiku Suai”, nia tenik.
Rekorda fali katak Departamentu Investigsaun Kriminál (DIK) Nasionál iha segunda (15/7) horseik, ezekuta mandadu Tribunál Judisiál Primeira Instánsia Suai (TJPIS) ho NUC 0004/23. ANHT hodi halo buska no apreesaun ba rezidénsia José dos Santos Naimori Bucar iha Soru- Craik, Postu Administrativu Ainaro Vila, Munisípiu Ainaro tanba envolve krime furtu agravadu ne’ebé previstu iha artigu 267 husi Kódigu Penál Timor-Leste.
Naimori envolve krime ne’e tanba deskonfia foti subar (naok) fatuk lulik iha Aldeia Bove, bairro Fatuk Kabelak iha Postu Administrativu Hutudo, Munisípiu Ainaro iha 2023. No fatuk lulik refere dadaun ne’e iha Naimori nia rezidénsia hodi uza ba enfeita.
Tuir informasaun ne’ebé jornalista TATOLI rekolla katak fatuk lulik refere momentu ne’ebá Naimori nia ema mak foti iha Hatudo ho hahalok Naimori nia ne’e, komunidade Bove bairro Fatuk Kabelak iha Postu Administrativu Hutudu lamenta no duun ba Naimori mak naok sira-nia fatuk lulik ne’ebé durante ne’e sira adora.
Ho akontesimentu ne’e, komunidade Bove bairro Fatuk Kabelak iha Postu Administrativu Hutudo hato’o keisa ba Tribunál Judisiál Primeira InstánsiaDili katak Naimori no nia membru naok sira-nia Fatuk lulik ne’ebé rai iha fatin sagradu iha Postu Administrativu Hatudo.
Nune’e iha segunda (15/7) horseik, maizmenus tuku 11:00 dader Departamentu Investigasaun Kriminál Nasionál dezloka kedan ba Naimori nia rezidénsia ne’ebé lokaliza iha Soru Kraik Postu Administrativu Ainaro Vila hodi haree evidénsia sira ne’e.
Jornalista: Natalino Costa
Editór : Zezito Silva
