AINARU, 29 Abríl 2026 (TATOLI) – Prezidente Repúblika (PR), José Ramos-Horta, entrega diretamente apoiu bens primeira nesesidade ba família sira ne’ebé konsidera kbi’it naton hamutuk uma-kain 100 iha merkadu Maubisse, Postu Administrativu Maubisse, Munisípiu Ainaru, Kuarta ne’e.
Programa ne’e realiza liu husi Unidade Sosiedade Sivíl no Asuntu Sosiál, hodi fahe nesesidade bázika ba família hirak ne’ebé antes ne’e identifikadu ona husi Autoridade lokál Postu Maubisse.
Pakote ai-han sira ne’e mak hanesan foos 25 kg (karon 100), mina han litru lima (kaixa 25) no roupa ba labarik sira.
PR mós entrega ekipamentu desportivu ba joven sira iha postu referidu, ho objetivu atu promove atividade saudável, hodi hametin unidade no hamenus risku sosiál entre joven sira.
Xefe Estadu hatete jestu ne’e hanesan sentidu solidariedade ba ema ki’ak sira ho objetivu atu hametin fraternidade no solidariedade entre ema, la’os tanba polítika.
“Ha’u la’os mai halo polítika. Ha’u la honoin liu ba ida ne’e, tanba ita ajuda ema ki’ak sira labele hanoin atu manán fali buat ruma. Fó kontibruisaun oituan liu husi fahe foos no mina tein no mós sei haree posibilidade atu harii uma dignu ba família vulnerável iha ne’e no hadia eskola”, Ramos-Horta informa ba jornalista sira iha merkadu Maubisse.
PR hatete, asaun ida ne’e la’os foin mak halo ba dahuluk, maibé dezde uluk kedas iha nia mandatu dahuluk, fó ona apoiu ba ema kbi’it laek sira inklui hadia no ajuda Madre sira nia rezidénsia. Tur Xefe Estadu, programa ne’e sei kontinua iha Timor tomak bainhira nia iha kapasidade hanesan Prezidente.
“Nu’udar ema, sei buka nafatin atu fahe buat [nesesidade bázika] balun ba ema sira ne’ebé laiha kbiit”, nia promete.
Prezidente haktuir liu husi programa ne’e, sai mós inspirasaun ida ba liurai Abu Dhabi, tanba sempre akompaña atividade prezidénsia nian, iha ne’ebé Liurai ne’e sei fó apoiu finanseiru milaun $10 hodi halo konstrusaun ba dormitóriu ida iha Dili, ne’ebé tuir planu sei harii iha fulan oin, ho objetivu atu simu estudante feto besik 300.
Iha fatin hanesan, Raúl Salsinha Almeida, ne’ebé akompaña nia feton, Senhorinha Verdial, tinan 56, ne’ebé simu apoiu ne’e haktuir, nia feton durante tinan barak ona seidauk simu apoiu ruma husi Estadu. Tanba ne’e nia sente onradu ho prezensa PR nian iha Maubisse hodi fahe nesesidade bázika ba família vulnerável sira.
“Ida ne’e foin primeira vez mak ha’u nia feton simu apoiu ida ne’e husi Prezidente Repúblika,” nia informa.
Nune’e mos João José Mendonça, tinan 51, agradese ba Xefe Estadu, tanba bele fahe ona foos ho mina tein. Nia haktuir, durante ne’e nia tur deit iha uma, tanba nia sofre moras ne’ebé halo nia labele halo servisu todan.
Notísia relevante: PR fó apoiu alimentár ba família vítima inundasaun iha Suai Loro
Jornalista: Afonso do Rosário
Editora: Isaura Lemos de Deus
