DILI, 17 jullu 2024 (TATOLI) – Prezidente Repúblika, José Ramos Horta, kontinua preokupa ho lei pensaun vitalisa ne’ebé habokur de’it ema balun no ema balu kontinua moris iha sofrimentu, nune’e ejize Parlamentu Nasionál no Governu atu halo alterasaun urjente.
“Presiza halo alterasaun ba Lei Pensaun Vitalisia tanba ne’e inmoral, ita labele konkorda ida ne’e, ida ne’e halo di’ak de’it ema balun, Nune’e Parlamentu Nasionál tenke konkorda atu halo alterasaun ba lei ne’e, sira tenke haree oinsa iha tinan 2025 tenke taka ona pensaun vitalisia, tanba pensaun vitalisia parte ida halo mohu ita nia osan,” Xefe Estadu hateten ba jornalista sira iha Palásiu Sinzas Lahane-Dili, kuarta ne’e.
Notísia relevante:Loron 120: CNRT prioriza sei aprezenta inisiativa altera lei pensaun vitalísia
Parlamentu Nasionál atu konkorda hodi halo alterasaun ba lei ne’e, nune’e hahú tinan 2026 tenke halo re-negosiasaun tanba klaru ko’a direitu arkeridu.
“Ba oin tenke iha mós re-negosiasaun klaru ko’a direitu arkeridu. Maibé direitu arkeridu ne’e ha’u iha dúvida, direitu arkeridu ka la arkeridu moralmente ho de’it motivasaun polítika la’os razaun atu haree fila-fali, maibé pensaun vitalisia tenke taka total tanba la di’ak,” dehan PR Horta.
Rekorda fali katak, iha loron 30 Janeiru 2023, Parlamentu Nasionál ajenda no halo ona diskusaun iha faze jeneralidade ba proposta-lei númeru 14/V(2a)-Rejime Jurídiku Seguransa Sosiál ba Titulár Órgaun Soberania.
Tuir prosesu proposta-lei ne’e bainhira aprova ona iha jeneralidade mak meza plenária sei haruka hikas mai komisaun A trata asuntu Justisa no Konstituisionál, hodi hala’o audiénsia atu submete hikas ba meza PN mak ajenda fali diskusaun iha faze espesialidade ne’ebé diskute kle’an kada artigu.
Ho nune’e, bainhira proposta lei ne’e aprova mak sei halakon lei pensaun vitalísia hodi muda fali ba iha Rejime Jurídiku Seguransa Sosiál ba Titulár Órgaun Soberania.
Nune’e, rejime ne’e atu halo transferénsia hosi lei ida ba rejime ne’e direitu sira hotu kedas balun hasai tiha no balun halo transferénsia trata iha rejime.
Konseitu hosi rejime ne’e trata regula iha kriteiru sé mak bele hetan no labele hetan no oinsá mak atribui direitu ne’e haruka ba seguransa sosiál implementa no persentajen regulamentu mak sei ko’alia.
Hanesan baibain rejime ida la’o tiha ona seguransa sosiál funsionáriu públiku koa 4% inklui funsionáriu iha empreza privadu desde organizasaun rejista, depois to’o sira pensaun foti sira nia direitu.
Notísia relevante:IX Governu sei halo revizaun ba lejizlasaun sira inklui Lei Pensaun Vitalísia
Jornalista: Hortencio Sanchez
Editór: Florencio Miranda Ximenes
