DILI, 18 jullu 2024 (TATOLI) – Diretór Servisu Saúde Munisípiu Díli, Mateus Pinto, enfaze katak tempu bailoron (Verão) ema hotu presiza uza máskara tanba rai-rahun barak, se la kumpre mak implika ba moras Infesaun Respiratória Aguda (ISPA).
Aleinde ne’e, presiza mós fase liman, moras hirak ne’e mosu tanba dala barak inan ho aman sira prepara hahán ne’ebé la moos.
“Atu halo prevensaun ba moras ne’e mak tempu bailoron presiza uza máskara bainhira ba fatin ida no husu ba inan-aman sira prepara hahán ne’ebé mak tenke fase moos, hodi hadook aan hosi moras sira ne’e”, nia revela.
Tuir dadus hatudu katak entre abríl ho juñu, rejista moras ISPA aas iha fasilidade saúde sira iha Dili, ho totál 78.364, maioria labarik sira.
‘’Sentru Saúde Becora rejista ISPA hamutuk 20.077, Comoro ho totál 41.297, Formoza 5.421, Metinaro 2.111, Vera Kruz 9.254, Klínika Privada 204 no totál 78.364 ne’ebé afeta liu ba pasiente ho idade 15 mai kraik mak sofre moras refere’’, Mateus Pinto ba jornalista sira iha nia kna’ar fatin, ohin.
Aleinde moras ISPA, rejista moras diarea akut, pneumonia, scabies, diárea ho ran, asidente tráfegu, moras kulit seluk no Urethral discharge.
Jornalista : Felicidade Ximenes
Editór : Zezito Silva
