DILI, 19 jullu 2024 (TATOLI)—Konstrusaun fíziku projetu Jadim de Chama Eterna ne’ebé foin hahú filafali iha tinan ne’e, daudaun atinje 10%.
Antes ne’e, projetu hahú iha tinan 2022, maibé laiha rezultadu signifikativu, nune’e iha tinan 2023 Governu liuhusi reuniaun Konsellu Admninistrasaun Fundu Infraestrutura (KAFI) deside suspende provizóriu no kontinua fali iha 2024.
“Iha laran chor (fui) hotu ona, ha’u espera no ha’u fiar katak tinan 2025 finaliza ona, karik laiha obstákulu ruma,” Diretór Ezekutivu Arkivu Muzeu Rezisténsia Timorense, Institutu Públiku (AMRT, I.P), Jorge Alves ‘We Moris’, informa hafoin atividade diálogu iha AMRT, Colmera, sesta ne’e.
Notísia relevante : Governu suspende provizóriu konstrusaun Jardim de Chama Eterna
Nia dehan, hafoin chor, serbisu iha faze tuir mai sei lalais, tanba baibain han tempu iha chor nian.
“Bee moris hela de’it iha okos sa’e mai, entaun susar tebes hodi finaliza. Bee maran mak bele fui semente kuandu sa’e hela labele, tanba ne’e lori tempu naruk,” nia akresenta.
Konstrusaun ne’e hahú iha VIII Governu Konstitusionál nia mandatu no IX Governu Konstitusionál kontinua de’it konstrusaun monumentu ida hodi relembra fali istória Timor-Leste.
“Konstrusaun ne’e seidauk finaliza no atrazu tebes, tanba projetu nia fízikamente foin mak nahe husi kraik. Ida-ne’e mós ha’u mai tiha ne’e mak foin nahe, antes ne’e seidauk ida. Sira só kee rai de’it, ha’u agora kontrola hela,” nia haktuir.
Jardim de Chama Eterna ne’e, tuir istória katak hanesan monumentu ida-neʼebé atu hatudu ba mundu katak istória Timor-Leste ne’e maihusi nakukun, tanba ne’e mak AMRT, I.P halo konstrusaun ida-ne’e atu memoriza eroi sira-neʼebé fó sira-nia vida tomak ba rai no povu ida-ne’e.
Obra ne’e refleta ba prosesu luta ukun rasik-an nian, tanba liafuan ‘Chama Eterna’ ne’e katak matebian husi loromonu-lorosa’e, tasi feto-tasi mane buka masin ho ahu karik, mai iha Jardim de Chama Eterna ne’e hodi deskansa depois mak fila.
Prosesu konstrusaun projetu ne’e ho nia durasaun to’o fulan-18, ne’ebé konstrusaun ne’e hahú iha loron 09 fevereiru 2022 to’o 10 agostu 2024, maibé seidauk haree nia progresu fíziku.
Kontratór ba projetu mak Star King Konstrusaun, Lda, halo parseria ho DMF asesu Unipessoal, Lda, ho nia montante osan hamutuk $4.548.172,69.
Jornalista : Osória Marques
Editora : Julia Chatarina
