VIQUEQUE, 24 jullu 2024 (TATOLI)- Ministriu Agrikultura Pekuária, Peska no Floesta (MAPPF), Marcos da Cruz, apoiu bero Fiverr class (klase fiverr) ba grupu Osomali Hirus husi suku Uani Uma, postu administrativu Uatucarbau, munisípiu Viqueque hodi uza ba atividade peskas.
“Ekipamentu bero ne’e Governu anteriór maka sosa, atu apoia ba grupu sira tanba ne’e ita distribui ba ita-nia grupu peskadór ida iha suku Uani Uma, hodi grupa uza ba peska atu hasa’e kuantidade ikan. Tanba ne’e ita fó fasilidade peskas nian hodi tulun ita-nia grupu tama ba tasi”, Ministru, Marcos da Cruz, hateten, iha ámbitu distribuisaun bero, iha postu administrativu Uatucarbau, tersa (23/07).
Tuir Governante ne’e, MAPPF planea ona ba tinan-2024 sei sosa tan bero peska unidade 40 hodi apoia ba grupu peskadór sira-ne’ebé seidauk hetan bero. “Tinan ida-ne’e ita sei sosa bero 40, hodi apoiu ba ita-nia peskadór sira tama ba tasi hodi kaer ikan,” nia realsa.
Ekipamentu peskas ne’ebé MAPPF apoia maka hanesan bero fiver class ida, makína Zonson, tali, ankor (jangkar) no kolete tasi nian (rompi).
Iha fatin hanesan, Koodernadór Grupu Osomali Hirus, Delfin Colho, hateten, durante ne’e grupu uza ekipamentu tradisionál uza ba kaer ikan, maibé Governu apoia ona ekipamentu bero hodi fasilita grupu kaer ikan.
“Ekipamentu ne’e sei ajuda ami tama tasi-laran hodi kaer ikan. Ami husu agradese ba Governu ba apoia fasilidade sira-ne’ebé fó ba ami sente sufisiente ba ami,” nia hato’o.
Tuir dadus benifisiáriu Grupu Osomali Hirus membru hamutuk na’in-10 kompostu husi mane na’in ualu no feto na’in rua.
Iha seremónia distribuisaun bero ne’e, Ministru Marcos da Cruz entrega ba administradór postu Uatucarbau no administradór entrega ba koordenadór grupu ne’ebé hetan akompañamentu husi Prezidente Autoridade munisípiu Viqueque, diretór servisu agrikultura Viqueque no autoridade lokál.
Notísia relevante:Peskadór barak lahalo jestaun di’ak ba utilizasaun ró peska – MAPPF
Jornalista: Vitorino Lopes da Costa
Editór : Rafael Ximenes de A. Belo
