DILI, 25 jullu 2024 (TATOLI)—Xefe Bankada CNRT iha Parlamentu Nasionál (PN), Duarte Nunes, hateten atu aprezenta inisiativa ka projetu atu altera lei Pensaun Vitalísia tenke konsulta ho bankada parlamentár sira hotu.
Notísia Relevante: FRETILIN-PD prontu apoia inisiativa altera lei Pensaun Vitalísia, CNRT prioriza
“Atu aprezenta projetu ne’e, tenke iha konsulta. Tanba ne’e ba hotu-hotu, ami bele ko’alia iha líder bankada hotu-hotu ko’alia, ami bele ko’alia took meza (PN) prepara, tanba hotu-hotu la’ós bankada mak hamosu. Signifika, meza bele prepara projetu ruma, ita subskreve, ita bele avansa,” nia hateten ba Agência Tatoli iha resintu Parlamentu Nasionál, kinbta ne’e.
Tanba ne’e, nia dehan, nu’udar bankada Governu sei buka ko’alia ba malu ho bankada parlamentár hotu hodi iha konsensu bainhira iha projetu ruma hotu-hotu subskreve hodi avansa ba oin.
“Sei ko’alia ba malu, hotu-hotu konsensu iha. Bainhira iha projetu lei ruma mosu, hotu-hotu subskreve, bankada hotu-hotu asina, signifika iha konkordánsia,” nia hateten.
Nia konkorka atu halakon tiha pensaun vitalísia hodi entrega fali ba seguransa sosiál, hanesan antes ne’e iha lejislatura anteriór diskute ona maibé la konsege ramata hodi kaduka tiha.
“Kona-ba lei pensaun vitalísia iha lejislatura anteriór ami ko’alia tiha ona, tenke iha konsensu para ita deside hamutuk, pensaun ida-ne’e labele iha ona. Tanba, agora iha lei seguransa sosiál ne’e mak intensaun kobre tiha lei pensaun vitalísia. Espera se bankada hotu-hotu ko’alia, ami prontu koopera atu halo alterasaun,” nia dehan.
Notísia Relevante: Alterasaun lei pensaun vitalísia kaduka bele kontinua iha lejislatura daneen
Jornalista : Nelson de Sousa
Editór : Cancio Ximenes
