DILI, 22 jullu 2024 (TATOLI)-Deputadu FRETILIN, Antonino Bianco, hateten, nu’udar bankada opozisaun prontu fó apoiu bainhira bankada Governu aprezenta inisiativa atu altera lei Pensaun Vitalísia.
Notísia relevante:https://tatoli.tl/2024/07/19/altera-lei-pensaun-vitalisia-kontinua-sai-prioridade-no-hein-aprezenta-inisiativa/
“Hanesan bankada opozisaun prontu fó apoiu, bainhira bankada sira ne’ebé agora ka’er ukun aprezenta inisiativa ita bele halo diskusaun,” deputadu ne’e hateten hodi responde Ajénsia TATOLI iha resintu Parlamentu Nasionál, segunda ne’e.
Nune’e bainhira iha inisiativa projetu aprezenta husi bankada Governu ba altera lei Pensaun Vitalísia hanoin hanesan bankada opozisaun prontu fó apoiu tanba ne’e halo di’ak ba interrese nasaun tanba haree ba Timor-Leste mós tuir previzaun ne’ebé iha to’o tinan-2034 sei hasoru presipísiu fiskál ka fundu mina rai besik hotu.
Ba bankada FRETILIN dezde uluk esforsu alterasaun lei Pensaun Vitalísia iha ona hodi halo redusaun no agora atu halakon Pensaun Vitalísia ne’e tenke konsensu entre bankada parlamentár hotu, no FRETILIN prontu fó apoiu bele halakon totál.
“Agora, atu halakon hotu hanoin bele, depende konsensu hodi halakon tiha, importante lei ne’e dehan altera entaun altera, purezemplu dehan Prezidente Repúblika, Primeiru Ministru, Prezidente PN mak hetan, ne’e para dehan dignifika de’it ne’e, karik alterasaun nune’e, maibé depende diskusaun konsensu,” nia hateten
Deputada PD, Maria Teresa Gusmão, hateten lejislatura ne’e foin mak hahú tinan ida no hanesan bankada ki’ikoan iha espetativa, maibé desizaun ne’e koletivu iha PN hotu-hotu nian.
Nune’e nu’udar bankada ki’ik mezmu nu’udar bankada Governu iha PN, bainhira iha inisiativa prontu fó apoiu altera lei pensaun vitalísia.
“Tan ne’e bainhira maiória hotu-hotu aseita altera pensaun vitalísia, PD prontu fó apoiu, nune’e ba bankada bo’ot sira bainhira foti asuntu ne’e iha PN mak PD nia pozisaun prontu fó apoiu,” membru órgaun lejislativa ne’e hateten
Enkuantu, antes ne’e, Deputada husi bankada CNRT, Cedelízia Farria dos Santos, hateten iha lejislatura daneen ne’e alterasaun lei Pensaun Vitalísia sai nafatin prioridade no agora hein aprezenta inisiativa projetu atu altera.
Notísia relevante:Altera lei pensaun vitalísia kontinua sai prioridade no hein aprezenta inisiativa
Jornalista: Nelson de Sousa
Editór: Rafael Ximenes de A. Belo
