DILI, 01 agostu 2024 (TATOLI)–Vise Koordenadór ba preparasaun vizita Papa nian hosi igreja no atuál pároku Igreja Santo António Motael, Pe. Guilhermino da Silva, hateten siboriu hamutuk 3.000 ne’ebé prodús iha Indonézia to’o ona iha Timor-Leste.
Notísia Relevante: Igreja prepara túnika 2.000 no siboriu 4.000 ba ministru estraordináriu
Nia hateten, instrumentu liturgjia hanesan siboriu 4.000 no kazula 1.000 ne’e prepara husi parte igreja hanesan Konferénsia Episkopál Timorense (CET) hodi bele utiliza iha misa solene ne’ebé Papa Francisco prezide iha 10 Setembru 2024, iha Tasi-Tolu, iha tuku 16h30 lrokraik.
“Instrumentu liturjia nian hanesan siboriu sira-ne’e kuaze to’o no iha ona Timor. Siboriu 4.000 ne’e, iha ona siboriu hamutuk 3.000 mak to’o ona iha Timor,” Vise Kordenadór ba preparasaun vizita Papa nian hosi igreja no atual pároku Igreja Motael, Pe. Guilhermino da Silva, hateten ba Agência Tatoli, iha Balide.
Siboriu balun tan, nia dehan, sei iha siboriu 1.000 mak tuir planu sei to’o iha Timor-Leste iha fulan-agostu nia klaran, tanba pagamentu ba instrumentu liturjia sira-ne’e konklui ona.
Iha instrumentu igreja nian ne’e to’o ona iha Timor-Leste mak kazula hamutuk 1.000 husi Indonézia, hodi bele kompletu ba preparasaun misa.
“Pagamentu ne’e, Konferénsia Episkopál Timorense mak halo. Kazula no tunika mós 100% prontu ba ministru extraordináriu sira. Iha kazula 1.000 ne’ebé to’o ona, husi Indonézia mak mai,” nia dehan.
Saserdote ne’e hateten, igreja hein de’it organiza oinsá atu bele fahe liuliu tunika ba ministru extraordináriu sira-ne’e.
Nia hateten, pagamentu kustu ba instrumentu liturjia nian ne’e, igreja halo pagamentu hotu ona no hein de’it atu uza iha selebrasaun misa Amu Papa ninian iha Tasi-Tolu.
Notísia Relevante: Papa Francisco sei prezide misa solene iha Tasi-Tolu iha 10 setembru
Jornalista : Jesuína Xavier
Editór : Cancio Ximenes
