DILI, 06 agostu 2024 (TATOLI)—Sekretaria Estadu Formasaun Profisionál no Empregu (SEFOPE) simu ona reklamasaun husi aplikante 146 ba vaga online serbisu iha Austrália, ne’ebé tuir ezame Pacific Australia Labour Mobility (PALM) Scheme.
Diretór Nasionál Empregu Estranjeiru, João Correia, hateten reklamasaun ne’e hato’o diretamente husi aplikante sira desde rezultadu korresaun ezame PALM Scheme publika iha loron 17 jullu 2024.
“Loos duni katak iha reklamasaun bainhira ita halo publikasaun rezultadu naran ba ezame eskrita vaga online serbisu iha Austrália tanba sira tuir ezame maibé naran la mosu, ita husu sira hato’o reklamaun. To’o oras ne’e iha ona ema na’in-146 mak halo reklamasaun no ami sei halo verikasaun ba sira-nia prezensa bainhira tuir ezame,” Diretór informa ba Agência Tatoli iha ninia knaar fatin, Becora, tersa ne’e.
Notísia relevante : Aplikante 42.081 vaga serbisu iha Austrália liu hotu teste eskrita
Ekipa husi SEFOPE sei haree ba rezultadu husi korresaun no pontuasaun partisipante sira-nian hodi haruka diretamente ba partisipante sira-nia e-mail hodi hatene sira-nia nível inglés tama iha kategoria verry poor, poor, sufisiente, good, verry good, ka exellent
“Karik loos duni katak sira tuir duni teste, ami sei fó valór ba sira liuhusi e-mail no ami sei husu deskulpa. Tanba husi e-mail ne’e sei sai hanesan evidénsia katak nia mós hola parte iha ezame PALM Scheme,” nia akresenta.
Iha biban ne’e, nia mós husu ba partisipante ida-idak ne’ebé tuir ona ezame ka teste maibé hasoru problema, atu hato’o reklamasaun ba SEFOPE, liu-liu ba sira ne’ebé tuir ona teste eskrita iha kada munisípiu dezde fulan-abríl liubá.
Antes ne’e, iha loron 17 jullu, SEFOPE fó sai rezultadu korresaun teste eskrita PALM Scheme, ne’ebé partisipa husi ba aplikante hamutuk 50.767, husi sira ne’e aplikante ne’ebé liu ka tuir teste hamutuk 42.081 no la liu ka la tuir ezame hamutuk 8.688.
Aplikante sira ne’ebé liu iha kategoria hitu mak sira ne’ebé tama kategoria excellent 52, verry good 840, good 6.921, suffisient 8.517, poor 18.931, no verry poor 6.820.
Jornalista : Arminda Fonseca
Editora : Julia Chatarina
