DILI, 08 agostu 2024 (TATOLI)—Universidade da Paz (UNPAZ) no Universidade Católika Timorense (UCT) sei loke klase internasionál ba nível lisensiatura iha área medisina jerál.
“Ami tinan ne’e estabelese klase internasionál ba departamentu medisina jerál, estudante sira ne’e mai husi Índia, Filipina inklui timoroan. Klase sei hahú fulan-setembru iha UNPAZ,” Reitór UNPAZ, Adolmando Soares Amaral, informa iha ninia knaar fatin, kinta ne’e.
Notísia relevante : UNPAZ utiliza subsídiu husi Governu hodi sosa mákina ba fakuldade enjeñaria
Daudaun, parte administrasaun rejista ona estudante hamutuk 300 husi Índia no Filipina no timoroan na’in-10.
“Iha Timor mós ema barak mak tuir teste maibé na’in-10 mak liu, nune’e mós husi Índia no Filipina ne’e estudante hamutuk 300 atu mai eskola iha ne’e,” nia akresenta.
Dosente hamutuk 50 husi Índia no UNPAZ rasik sei hanorin iha klase internasionál.
“Sira sei mai hela iha otél no daudaun ne’e ami prepara hela sala aprendizajen ho padraun internasionál, ho kondisaun sira-ne’e ami laiha problema, estudante sira sei selu tuir tarifa ne’ebé mak ita aplika, tanba klase ne’e internasionál entaun presu mós internasionál, tanba ema husi nasaun seluk mak mai eskola iha ne’e, entaun propina mós internasionál inklui fasilidade,” nia tenik.
Jornalista : Osória Marques
Editora : Julia Chatarina
