DILI, 03 setembru 2024 (TATOLI)–Estudante husi Eskola Ensinu Baziku Sentrál (EBC, sigla portugés) 30 agostu, EBC 10 dezembru no Ensinu Sekundáriu Jerál (ESJ) Finantil, hahú halo limpeza jerál.
“Preparasaun vizita Sua Santidade Papa Fransisco mai Timor-Leste eskola 30 agostu ne’e entrada, entaun primeiru mak ami limpeza ba areadór eskola, liu-liu iha estrada boot sira ne’e, iha li’ur ne’e ami komesa pinta ona morru balun ne’ebé mak foer ami pinta filafali hamoos tiha ona. Komisaun organizadora mós mai fó ona retiru ba labarik sira inklui profesór sira hotu iha vida espirituál, iha semana kotuk entaun semana ida-ne’e ita foka ba limpeza hodi prepara-an simu Papa Fransisco,” Diretór Eskola EBC 30 agostu, Baltazar Boromeu, hateten, iha Comoro, tersa ne’e.
Estudante no sarani katólika iha loron 09 setembru ne’e sei hamriik iha estrada hodi simu Amu Papa nune’e ho esperansa katak vizita ne’e bele lori dame no ksolok mai ema ida-idak nia moris.
Diretór Eskola EBC 10 dezembru, Calistro Guterres, hateten, relasiona ho vizita Papa Fransisco nian, parte eskola sei hahú limpeza iha loron 06 no 07 setembru.
“Preparasaun ba simu Sua Santidade Papa Francisco ne’e ita hetan orientasaun husi Ministériu Edukasaun hodi responsabiliza ba limpeza jerál, entaun EBC terseiru siklu ensinu sekundáriu jerál sei serbisu hamutuk hodi halo limpeza iha areadór eskola no estrada sira-ne’e hotu depois ami mós sei hamoos no pinta foun fali morru ne’ebé mak hakerek lia-fuan oin-oin iha ne’ebá,” nia akresenta.
Notísia relevante : Vizita Papa Francisco lori grasa mai Timor-Leste
Calistro Guterres iha esperansa katak husi vizita ida-ne’e timoroan bele hadomi malu liután hodi lori nasaun ne’e ba oin.
“Nu’udar timoroan sente orgullu ba vizita ne’e, ho esperansa katak vizita ida-ne’e timoroan sira hotu sei fó liman ba malu hodi moris hamutuk iha dame nia laran nune’e lori ita-nia nasaun ne’e ba oin,” nia tenik.
Profesór Asuntu Estudante Finantil, Basilio Ximenes, subliña, estudante Finantil sira tuir ona retiru iha semana kotuk no semana ida-ne’e nia laran sei halo limpeza jerál iha estrada boot.
“Kona-ba limpeza ne’e ita hetan orientasaun husi Ministériu Edukasaun ne’ebé dehan katak kada eskola sira sei halo limpeza iha estrada boot ne’ebé Papa Francisco liuba ne’e, entaun ami sei limpeza jerál iha estrada boot. Nune’e mós eskola Finantil rasik hetan ona retiru no misa iha semana entaun agora ita nu’udár sarani katólika prepara fuan ho laran atu hein vizita sua santidade Papa Francisco, hodi simu bensaun wain, nune’e ita moris nafatin iha dame no paz nia laran,” nia katak.
Jornalista : Osória Marques
Editora : Julia Chatarina
