DILI, 05 setembru 2024 (TATOLI) – Papa Francisco selebra Misa Aberta ba Fiar Na’in Katóliku hamutuk 80,000-resin, iha Estádiu Gelora Bung Karno, Jakarta Indonézia.
Sarani Katóliku Indonézia 80.000-resin hakoor Estádiu Gelora Bung Karno ho kór kinur no mutin reprezenta Bandeira Vatikanu, no kór mean, mutin, reprezenta Bandeira Indonesia.
Rihun ba rihun fiar-na’in Katóliku hahú tama Estádiu iha tuku rua lorokraik ho entusiazmu boot hein no hakarak hare Papa nia vizita ikus iha Indonézia.
Antas hakat ba Altar Santu, Papa Francisco simu direta husi Prezidente Republika, Joko Widodo, no hetan akompaña husi lider politiku, no lider relijiozun sira.
Sarani Katóliku simu Papa Francisco ho basa liman maka’as, hiit badeira kinur mutin no mean mutin hodi hakilar “Viva Il Papa Francisco”.
Antes Amu Papa hatuur ain iha Altar Santu, Amu Papa vizita uluk sarani rihun ba rihun hein nia iha Estádiu Madya ne’ebé lokaliza besik Estádiu Gelora Bung Karno.
Santu Padre hatuur ain iha Estádiu Gelora Bung Karno mais ou menus tuku 4.21 lorokaraik no simu ho lian hakilar makas “Vival Il Papa”.
Papa Francisco nafatin hatudu nia umilde hodi lolo-liman ho hamnasa kumprimenta sarani sira iha koridor bainhira la’o haleu Estudiu.
Iha Santu Padre nia ómilia hateten bainhira hasoru malu ho Jesus signifika ita hotu atu haburas atetude rua ne’ebé mak lori ita ba sai Nia eskolante. “Rona Na’in Nia Lia Fuan no Haburas Lia-Fuan Ne’e.”
“Buat hotu mai husi rona, no mai husi loke ita laran ba Nai Maromak, no simu prezente furak husi Nai Nia amizade. Tanba ne’e importante atu ita hamoris liafuan ne’e, selae ita rona saugati de’it no habosok ita aan,” Papa Francisco dehan.
Santu Padre husu ba sarani Katólika Indonezia tomak atu labele haluha katak atu sai eskolante Nai Maromak nian la’os deit enfeita an ho buat furak husi liur.
“Ita nia fé hahú bainhira ita simu Nai Jeusu ba ita nia moris no fo fatin ba Nia, no rona Nia lia fuan,” Dehan Santu Padre.
Papa Francisco husu Indonezia nafatin hari unidade entre relijiaun oioin. “Ha’u hakarak enkoraza imi hotu kuda fini domin nian, loke dalan ba diálogu, no kontinua hatudu imi-nia bondade no benevolénsia hodi harii unidade no pás,” Sua Santidade hato’o lia-hirak ne’e ba Fiar-Na’in Katóliku 80,000-resin, iha Estádiu Gelora Bung Karno, kinta ne’e.
Entretantu, Prezidente Widodo hafoin simu Santu Padre molok Misa Solene ne’e, nia hateten sarani Katóliku Indonezia kontente tebes ho prezensa Papa Francisco nian.
“Ba Fiar Na’in Katóliku Indonézia tomak, ohin loron ita kontente tebes ho Papa Francisco nia prezensa iha Indonezia,” Widodo hatete liuhusi vídeo fó sai iha Estádiu Gelora Bung Karno.
Molok husik hela Estadiu Gelora Bung Karno, Papa Francisco hato’o ninia agradesimentu ba Cardinal Ignatius, no bispu, inklui padre, diakónu no madre sira hotu ne’ebé mak kontinua haklaken Nai nia evanjellu iha Indonézia.
Santu Padre mós hato’o ninia obrigadu ba Prezidente Widodo, sosiedade sívil, autoridade, seguransa no apresia sidadaun Indonézia tomak ba sira-nia apoiu. “Maun-Alin sira, Maromak fó Bensaun imi hotu no halo imi buras liu tan hodi prezerva dame no domin fraternu iha rai ne’e.”
Notísia relevante:Amu Papa hakarak ‘relijiozu’ Indonézia sai testemuña ba Resurreisaun
Jornalista: Filomeno Martins
Editór: Rafael Ximenes de A. Belo
