DILI, 16 Setembru 2024 – Sekretaria Estadu Komunikasaun Sosiál (SEKOMS) apresia no louva mídia estatál no privadu, hanesan imprime no plataforma dijitál sira hotu ne’ebé halo kobertura, iha ámbitu vizita Papa Francisco iha Timor-Leste, entre loron 09 no 11 Setembru 2024.
“Governu agradese ba ita-nia serbisu hamutuk ne’ebé estraordináriu. Ita-boot sira-nia ekipa redasaun, liuliu jornalista no tékniku sira-nia dedikasaun no esforsu hotu ba kobertura iha ámbitu vizita Estadu no Apostólika Sua Santidade Papa Francisco iha Timor-Leste folin boot tebes”, Sekretáriu Estadu Komunikasaun Sosiál, Expedito Loro Dias Ximenes hateten iha nota imprensa ne’ebé Tatoli asesu, ohin.
Governante ne’e dehan Rádiu no Televizaun Timor-Leste, Empreza Públika (RTTL, E.P.) no Grupu Media Nasionál (GMN) halo tranzmisaun direta ho kapa’as tebes, plataforma mídia dijitál, nasionál no internasionál, arkivu no produtór audiovizual sira foti output ho di’ak maske sei iha difikuldade oioin.
Aleinde ne’e, SEKOMS mós apresia no louva parseiru sira hotu, liuliu TIC-Timor, I.P, DNIK-Ministériu Transporte no Komunikasaun (MTK), Timor Telecom, Telkomcel, Telemor no internét provider sira hotu.
Sekretáriu Estadu espera katak kolaborasaun no parseria ida ne’e bele kontinua ba atividade seluk Governu nian iha futuru.
“Sussesu ida ne’e ita hotu nian. Susesu tanba hotu-hotu tau aas interese públiku nian ba informasaun no arkiva memória vizita Papa Francisco iha Timor-Leste”, Sekretáriu Estadu afirma.
Tuir dadus ne’ebé fó sai husi sekretáriu Estadu, jornalista nasionál no internasionál hamutuk 485 mak rejistradu hodi kobre vizita pastorál Papa Francisco nia iha Timor-Leste.
“Jornalista nasionál no internasionál ne’ebé halo kobertura ba Papa nia vizita ne’e hamutuk 485. Totál ne’e inklui jornalista ne’ebé akompaña Papa iha aviaun hamutuk 80 no jornalista estranjeiru 75 ne’ebé aplika liuhusi online no jornalista nasionál hamutuk 300”, Expedito Ximenes informa foin lalais ne’e, iha Motael, Dili.
TATOLI
