OÉ-CUSSE, 01 Outubru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, informa sei submete, iha tempu badak, relatóriu ezekusaun orsamentu rihun $100-resin ba vizita Papa nian ba Governu sentrál, tanba daudaun ne’e komisaun oraganizadora prepara hela.
“Ami sei halo relatóriu no agora prepara hela. Ida-ne’e buat ida la’ós difísil, tanba Oé-Cusse nia akampamentu ne’e bainhira ita sai ona, ita husik buat hotu. Ne’e ita la na’ok buat ida, ne’ebé ita sei aprezenta ba Governu iha tempu badak”, Rogério Lobato dehan ba jornalista sira iha Oé-Cusse.
Nia lembra katak, antes ne’e, Governu sentrál aloka fundu ba RAEOA hamutuk rihun $50, maibé autoridade aumenta tan verba husi subvensaun públika rihun $50-resin, ne’ebé totál hamutuk rihun $100-resin mak uza ba peregrinu sira husi Oé-Cusse bá Dili durante semana ida.
“Agora Ita-nia ezekusaun ne’e ba hahán mak barakliu no ezekusaun seluk mak ba transporte ita uza rihun $50 bá-mai. Restu ne’e ba hahán de’it durante semana ida liu”, nia relata.
Prezidente ne’e esplika razaun autoridade aumenta osan rihun $50-resin, tanba verba ne’ebé Governu sentrál aloka ba RAEOA hamutuk rihun $50 ne’e la sufisiente.
“Entaun, ita tenke aumenta, tanba ema kuandu hela ona iha ne’ebá [Pelican Paradise] nia tenke han, sei sarani sira la han, Prezidente Autoridade mak iha kulpa, ne’ebé ita haree iha loron daduluk hahán ladún di’ak. Hahán ne’e $4, maibé sira fó fali $1 nian”, nia lamenta.
Lembra katak, iha vizita Papa Francisco nian mai Timor-Leste, entre loron 09 no 11 Setembru, peregrinu sira husi Oé-Cusse mós mai kapitál hodi partisipa misa ne’ebé dirije husi Pontífise iha loron 10 iha Tasi-Tolu.
Tanba ne’e, sarani sira husi Oé-Cusse tenke mai uluk iha Dili, tanba viajen liuhusi tasi ne’ebé hahú iha loron 03 to’o 07 Setembru. Durante iha Dili, peregrinu sira hela iha akantonamentu iha Pelican Paradise, iha Tíbar.
Totál peregrinu sira husi Oé-Cusse hamutuk 2.344, komposta husi funsionáriu Governu na’in-473, husi parókia Numbei 806, Padiae 316, Oésilo 210, kuaze parókia Pássabe 167 no parókia Baoknana na’in-270.
Notísia relevante: Ohin, peregrinu 500 husi Oé-Cusse viajen uluk ho ró Berlin Ramelau
Jornalista: Abílio Elo Nini
Editora: Maria Auxiliadora
