DILI, 11 outubru 2024 (TATOLI) – Diretór Servisu Saúde Munisípiu Dili, Mateus Pinto informa prevensaun ba dengue mak ekipa Servisu Saúde Munisípiu Dili hahú halo sensilbilizasaun ba komunidade atu halo limpeza ba idaidak nia uma ka bairo hafoin udan monu rai.
“Sensibilizasaun ba komunidade ne’e importannte atu sira bele hahú limpeza iha idaidak nia uma ka bairo hafoin udan monu rai, tanba ita boot sira hatene katak fomigasaun la’o nafatin no ita-nia abate sufisiente atu atende ba komunidade sira”, Mateus Pinto dehan ba jornalista sira iha City8, Manleuana, ohin.
Nia dehan, ekipa husi Servisu Saúde Munisípiu Dili tama sai bairo hodi aviza ba komunidade sira atu limpeza.
“Ita-nia ekipa nafatin tama sai bairo, aviza ba komunidade sira atu hamoos sira-nia bairo no hela fatin nune’e bainhira udan monu labele hamosu moras dengue ida-ne’e. Tanba dalabarak ita halo fomigasaun ne’e haree ba kazu, se kazu ne’e iha bairo ida, ita tun ba rega husi metru 200, husi uma ne’ebé kazu dengue mosu ba”, nia afirma.
Nia dehan, janeiru to’o setembru, Servisu Saúde Munisípiu Dili, rejista ona kazu dengue iha Munisípiu Dili hamutuk 600, husi ne’e mate na’in ida.
“Ha’u hanoin tinan ida-ne’e, ita bele minimiza kazu dengue ne’e rasik tanba ita haree fali ba tinan kotuk ema mate ba dengue barak, maibé tinan ida-ne’e menus, signifika ekipa sira-nia servisu halo sensibilizasaun ne’e mak di’ak hodi hanorin komunidade sira limpeza sira-nia uma ninin no bairo sira”, nia konklui.
Jornalista : Felicidade Ximenes
Editór : Zezito Silva
