COVALIMA, 17 Outubru 2024 (TATOLI) – Diresaun Transporte no Komunikasaun Covalima arrekada, husi Janeiru to’o 15 Outubru, reseita hamutuk $71.971,50 ba kofre Estadu.
Diretór DTK Covalima, Joaquim Gusmão, dehan fonte reseita ne’e mai husi inspesaun ba veíkulu, renova lisensa ba transporte públiku, karta kondusaun no halo rejistu veíkulu hanesan troka proprietáriu, troka xapa matríkula no xapa matríkula lakon.
“Diresaun Transporte no Komunikasaun kontribui reseita ba kofre, maibé ami nafatin hasoru difikuldade tanba edifísiu ladún favoravel atu halo atendimentu ba sidadaun sira trata dokumentu”, Joaquim Gusmão lamenta iha Bairru Costa, ohin.
Daudaun ne’e, diresaun uza de’it cube house ho kuartu rua, ne’ebé ida uza hodi halo atendimentu ba ema sira no kuartu seluk ba diretór hodi hala’o nia serbisu.
Dirijente ne’e informa katak Diresaun Transporte Covalima mós iha ona mákina impresaun ba karta kondusaun, maibé presiza atu kompleta nia materiál sira hanesan tinta no seluk tan, nune’e bele imprime ona karta kondusaun orijinál ba sidadaun sira ne’ebé uza provizóriu ho suratahan mutin.
“Diresaun Transporte Covalima iha blanko orijinál atu imprime karta kondusaun hamutuk rihun-resin, hein de’it materiál balun bele imprimi ona karta kondusaun orijinál ba sidadaun-sira iha Covalima”, dehan.
Joaquim Gusmão husu ba sidadaun sira-ne’ebé utiliza transporte públiku no privadu bainhira dokumentu mate ona presiza halo renovasaun, nune’e Polísia Tránzitu sira halo pasa revista iha ona dokumetu kompletu.
Sidadaun Fernando Amaral rekomenda ba Governu presiza konstrui ona edifísiu ba funsionáriu sira iha Diresaun Transporte no Komunikasaun Covalima, tanba sira-nia serbisu kontribui, kada tinan, reseita ba Estadu.
“Sira-nia kondisaun edifísiu ladún seguru atu halo atendimentu ba sidadaun sira bainhira trata dokumentu”, nia realsa.
Notísia relevante: Kondutór 2.921 iha Covalima seidauk hetan karta kondusaun orijinál
Jornalista: Celestina Teles
Editora: Maria Auxiliadora
