COVALIMA, 10 Dezembru 2024 (TATOLI) – Departamentu Reprezentasaun Territoriál no Planta Industriál Covalima seidauk distribui fini ai-oan ba agrikultór sira, tanba la simu pedidu husi to’os-na’in no Organizasaun Naun-Governamentál sira atu kuda ai oan.
Xefe Departamentu Reflorestasaun Territoriál no Planta Industriál Covalima, Domingos Gusmão, esplika katak atu distribui fini ai oan ne’e tenke bazeia ba pedidu ruma husi agrikultór sira atu kuda iha postu administrativu sira.
Tuir nia, iha 2024 ne’e, Floresta Covalima implementa programa viveiru komunitáriu nivel nasionál ne’ebé prepara fini ai-oan rihun 11 iha aldeia Dais, suku Belekasak, postu administrativu Maucatar, no viveiru komunitáriu nivel munisipál iha suku Debos, postu Suai, hamutuk rihun 15.
Espésie fini ai-oan ne’ebé tékniku Floresta Covalima implementa iha programa viveiru komunitária rua ne’e hamutuk rihun 26 ho espésie ai-oan hanesan ai-teka, kakeu, saria, mahoni no seluk tan.
“Tékniku Floresta prepara de’it fini ai-oan. Kona-ba atu kuda ai-oan ne’e inisiativa mai husi komunidade mak hato’o pedidu hafoin tekniku halo observasaun bá fatin mak foin bele distribui fini ba sira atu kuda. Ha’u foin mak simu kontaktu husi ajénsia internasionál World Vision hodi husu fini ai-oan, maibé seidauk hato’o pedidu”, nia adianta.
Tékniku Floresta, António Barros, sekunda katak kada tinan sira implementa programa viveiru komunitáriu hodi prepara fini ai oan, nune’e iha tempu udan agrikultór sira bele kuda iha idaidak nia to’os.
“Programa viveiru komunitáriu munisipál ha’u mak tau-matan, ne’ebé ita prepara fini ai-oan hamutuk rihun $15, kompostu husi espésie mahoni rihun 5, kakeu rihun ida, ai-teka 200, ai-saria 500, sonokeling 100 no tanjerina 200 no ai sira seluk”, dehan.
Notísia relevante: Floresta Covalima rekolla reseita $7.250
Jornalista: Celestina Teles
Editora: Maria Auxiliadora
