DILI, 27 janeiru 2025 (TATOLI)—Ministru Interiór, Francisco da Costa Guterres, hateten Ministériu Interiór (MI) hamutuk ho Komandu Jerál PNTL konsege reabilita ona postu Unidade Patrullamentu Fronteira (UPF) hamutuk 41.
“Postu UPF iha fronteira ne’e hamutuk 47. Agora ita reabilita tiha ona 41. Falta neen (6) mak Ajénsia Dezenvolvimentu Nasionál (ADN) tenke haree filafali nia dezeñu balun,” Francisco Guterres hateten ba jornalista sira bainhira partisipa serimónia avaliasaun prioridade lima Komandu Jerál PNTL 2023-2028 ne’ebé hala’o iha Suai Room, Timor Plaza, segunda ne’e.
Nia haktuir, postu UPF hamutuk 41 ne’ebé Governu halo ona reabilitasaun ne’e Governu mós instala ona ekipamentu.
“Ita presiza instala para sira bele halo servisu di’ak. Maski sira iha área remota maibé pelumenus sira mós bele akompaña saida mak ita halo. Ita presiza tau fasilidade nune’e sira mós bele halo servisu ne’ebé di’ak,” nia afirma.
Governante ne’e hatutan katak Ministériu Interiór sei tau prioridade ba infraestrutura polisiál iha fronteira tanba infraestrutura UFP nian iha fronteira barak mak aat, tanba ne’e Governu tau uluk prioridade ba infraestrutura.
“Ami hahú husi fronteira. Tanba ne’e, ami agora hahú daudaun halo reabilitasaun ba postu UPF iha fronteira. Ita rezolve uluk infraestrutura tanba sira (UPF) kondisaun mak aat liu tiha kedas. Uma nakfera hotu. Hariis fatin laiha no izoladu,” nia konklui.
Baze Legál
Mandatu ba PNTL nia Unidade Patrullamentu Fronteira (UPF) ne’e foti husi: IV Governu Konstitusionál nia Dekretu-Lei nú. 9/2009, loron-18 fulan fevereiru, kona-ba lei orgánika Polísia Nasíonál Timor-Leste, artigu 33.
Funsaun husi UPF hala’o patrullamentu no vijilánsia iha fronteira territoriál sira, no iha koordenasaun no kooperasaun ho parte interesada sira seluk, espesialmente ho F-FDTL. Kontrola movimentu ema no sasán sira iha fronteira territoriál, ho koordenasaun no kooperasaun ho Servisu Migrasaun no Alfándega.
Koopera mós ho autoridade administrativa relevante sira seluk tuir lejizlasaun fiskál, aduaneira no sanitaria, aplika lei sira relasiona ho tráfiku umanu, tráfiku droga ilegál, tráfiku kilat no atividade kriminál organizadu sira seluk, fó seguransa iha aeroportu hodi hala’o patrulla hale’u pista, terminál no aeroportu ho kooperasaun hamutuk ho parte interesada sira seluk no kna’ar lejítimu sira seluk, tuir nia misaun.
Jornalista: Natalino Costa
Editór: Xisto Freitas da Piedade
