DILI, 06 fevereiru 2025 (TATOLI)–Prezidente klube Relay Laleia FC, Feliciano Ximenes, deside kandidata-aan hodi kompete ba kargu Prezidente Liga Futeból Timor-Leste (LFTL) períodu 2025-2029 iha kongresu ne’ebé sei realiza iha tempu badak.
“Ha’u-nia pozisaun preparadu tanba hetan rekomendasaun direta husi ita-nia líder ida hadomi futeból na’in ba klube AD SLB Laulara Avo Kay Rala Xanana Gusmão. Tanba, Avo mak haruka ha’u prontu no preparadu atu ba kompete iha kongresu, maske kongresu ita seidauk hatene bainhira. Maibé, tuir informasaun atu hala’o iha fulan-fevereiru ne’e,” Feliciano Ximenes hateten ba Agência TATOLI iha kuartél Unidade Espesiál Polísia (UEP) Bairro-Pite, ohin.
Nia dehan, líder karismatiku Kay Rala Xanana Gusmão bolu direta hodi husu nia atu kandidata-aan no nia rasik simu hodi avansa ba oin.
“Avo rasik bolu ha’u, nia husu ó prontu ka lae, entaun ha’u simu. Avo bolu ha’u ne’e tanba sira nia haree durante ne’e ha’u organiza jogu barak. Ida-ne’e mak ha’u responde katak Avo mak haruka ha’u pronto. Ida-ne’e ba ha’u hanesan responsabilidade boot ida, nu’udar timoroan ida hadomi futeból, nusa ha’u labele,” nia hateten.
Nia hatutan, planu no programa ne’ebé nia halo ne’e aprezenta ona ba lideransa ne’ebé haruka nia kandidata-aan.
“Programa no planu ha’u nian haruka hotu ona ba ita-nia lideransa sira-ne’ebé haruka ha’u kandidata aan. Ha’u-nia programa sira tuir saida mak ita-nia realidade, ita haree agora ita-nia liga ne’e Liga Timor-Leste, la’ós liga sira munisipál ne’e ou jogu sira baibain. Tanba, ita ba ona liga profisionál nasaun barak mak tau matan ona mai ita, oinsá mak ita dignifika no armoniza liga ne’e sai orgullu la’ós iha nasionál de’it maibé ba mós internasionál,” nia dehan.
Durante kongresu, klube futeból hamutuk 21 ne’ebé hamahan aan iha LFTL husi primeira no segunda divizaun mak iha direitu votu, nune’e Feliciano koko halo ona aproximasaun ho Prezidente klube hotu nune’e bele fó apoiu másimu ba nia kandidatura.
Feliciano ho nia programa prioridade sira
Nia kandidata-aan atu sai Prezidente LFTL ne’e ho vizaun mak promove inovasaun no modernizasaun futeból Timor-Leste hodi hadi’a sistema Liga Timorense ne’ebé efisiente, transparente, no kompetitivu ho baze iha teknolojia digitál.
Ninia misaun mak atu dignifika no armoniza no desenvolve estrutura digitalizasaun ba operasaun liga, hadi’a kondisaun klube sira no monitoriza joga no promove prezensa futeból Timor-Leste iha plataforma nasionál no internasionál.
Iha kongresu ne’e mak nia eleitu sai Prezidente LFTL mak nia sei tau tau prioridade liu ba pontu importante haat (4) mak hanesan;
- Subsídiu ba klube, aumenta subsidiu 75% ba klube 1ª divizaun no 2ª divizaun.
Fó prémiu dignu ba klube ne’ebé kampiaun mak 1ª Divizaun: Mínimu $50,000 no Máximu $100,000 no 2ª Divizaun: Mínimu $25,000 no Másimu $50,000
Subsidiu ne’ebé atu fó tuir kontribuisaun husi Ministériu Juventude Desportu Arte no Kultura (MJDAK), Federasaun Futeból Timor-Leste (FFTL) no Patrosinadór sira.
- Playoff klube, halo uluk Play-off ba klube 3ª divizaun hodi kompleta liga 2ª divizaun.
- Realiza mós liga ba jogadór juniór sira ho idade 17 mai kraik.
- Sei koordena ho Ministru Justisa atu haree fatin propriu atu harii edifisiu ba LFTL.
Prioridade Digitalizasaun
Nune’e mós bainhira eleitu sai Prezidente LFTL karik, nia sei estabelese plataforma unifikadu hodi rejistu jogadór sira iha Timor-Leste.
- Plataforma dijitál liga, estabelese plataforma unifikadu ba registu jogadór, treinadór no klube.
Permite klube sira hala’o rejistu dijitál no akesa informasaun relevante.
- Sistema estatístika no analiza jogu. Kolekta dadus estatístika jogu no kompetisaun.
Haforsa analiza performansa jogadór, árbitru no klube.
- Transparénsia Finansiál.
Harii sistema online ba relatóriu finansiáll no monitoriza fundu liga hodi prevene abuzu finansiál no promove kredibilidade.
- Komunikasaun dijitál:
Estabelese aplikasaun ofisiál liga Timorense ba atualizasaun direta kona-ba jogu no estatístika. Aumenta presiénsa dijitál iha plataforma sosiál ba promosaun futeból.
- Treinamentu dijital:
Haforsa plataforma treinamentu dijitál ba jogadór, treinadór no árbitru. Fó asesu ba kontéudu edukativu relevante husi Federation International football Assosiation (FIFA) no organizasaun futeból internasionál.
- Transmisaun Online:
Haforsa parseria ho plataforma streaming ba publikasaun jogu live online.
- Impaktu Dijitalizasaun:
Dijitalizasaun sei hadi’a efisiénsia administrativu, promove transparénsia iha operasaun liga, Aumenta asesu ba informasaun futeból ba públiku. Valoria futeból Timor-Leste iha plataforma lokál no internasionál.
Jornalista : Hortencio Sanchez
Editór : Cancio Ximenes
