DILI, 04 jullu 2019 (TATOLI)-Sarani Katólika iha Timor-Leste (TL) iha devosaun makaas hanesan reza tersu, partisipa iha prosesaun sira no misa eukaristia nia iha domingu-domingu, maibé tuir Vigáriu Episkopál Re-evanjelizasaun ba asuntu Relijiozu Dioseze Dili, Amu Leonardo Dibiawiyata, SJ nia haree no nia akompañamentu katak, sarani sira seidauk kompriende kona-ba sira nia fiar.
Ho situasaun ne’e, Amu Dibio rekoñese katak, dioseze presiza reforsa mekanizmu pastorál iha tempu ohin loron nian maka, formasaun kontinua ba sarani sira, liuliu katekista sira liuhusi katesizmu.
Ho formasaun ne’e, Amu Dibio fiar katak, sarani sira sei maduru iha sira nia fiar, tanba sira kompriende didi’ak saida mak sira fiar.
Amu Dibio hatutan, importante liu, buat ne’ebé sarani sira presiza hakle’an mak lee beibeik no aprende kona-bá Sagrada Eskritura ho Maromak Nia Ukun Fuan sira.
Atu implementa formasaun ida ne’e, Amu Dibio hateten, responsabilidade másimu maka Bispu Dioseze Dili rasik, Pároku sira hamutuk ho ajente pastorál sira.
Antes ne’e Vigáriu Episkopál Re-evanjelizasaun ba asuntu Pastorál Dioseze Dili, Padre Juvito do Rego hateten, atu haforsa pastorál iha dioseze Dili, maka tinan ne’e foku ba Juventude Misionáriu.
Amu Juvito esplika, mekanizmu pastoral ne’e Dioseze hahú ona ho movimentu boot ida hodi halo formasaun, no akompañamentu ba joven sira iha parókia hotu, iha programa boot liu maka akampamentu juventude ne’ebé la’o ona durante semestre ida.
Iha sorin seluk, Frater Rui Asa Mau husi Parókia São Francisco Xavier Hatolia hateten, atividade pastoral ba tinan ne’e kona ba juventude misionáriu maka, parókia forma no mobiliza juventude ne’ebé hanaran Joven ba Kristu (JBK).
Atividade ne’ebé joven sira halo maka, iha Domingu halibur malu lee Biblia, fahe esperiénsia no halo akampamentu, inklui vizita família.
Frater Rui Asa Mau hatutan, oras ne’e daudaun husi parókia mós prepara atu reativa hikas estrutura joven parókia too estasaun no kapela.
Iha ultimo maka sei halo akampamentu jerál iha Fatubesi entre juventude husi vigararia Ermera.
Jornalista : Cipriano Colo
Editór : Francisco Simões
