KOVALIMA, 19 fevereiru 2025 (TATOLI)– Prezidente Autoridade Munisípiu Kovalima, reprezenta husi Sekretáriu Munisipál Planeamentu, Investimentu no Dezenvolvimentu Integradu, Caetano dos Santos fó pose ba membru Komisaun jestaun dezastre munisípiu (KJDM) hodi preparadu atu responde situasaun dezastre naturál iha Kovalima.
“Ohin fó pose ba estrutura no membru. Prezidente Autoridade Kovalima fó Despaixu nia kompeténsia mai ha’u hanesan, simbolikamente, fó pose ba membru Komisaun jestaun dezastre munisípiu Kovalima”, Ceatano dos Santos hato’o ba TATOLI iha AMC, ohin.
Autoridade ne’e dehan, kondisaun klima no kada tinan Kovalima sempre akontese dezastre naturál ho tipu erozaun, inundasaun, anin sobu uma, entaun munisípiu presiza halo preparasaun ekipa nune’e akontese dezastre ekipa sira tuun direta ba terrenu.
“Ita presiza halo preparasaun atu responde ba situasaun nune’e bainhira akontese dezastre membru KJDM tuun ba terrenu ida-idak hala’o nia servisu,” nia dehan.
Enkuantu, Diretór Servisu Munisipál Protesaun Sívil Jestaun Dezastre Naturál, João Martins esplika katak, ho kondisaun klima iha Kovalima bainhira mosu dezastre naturál ho tipu oioin nune’e ekipa simu pose mak sei tuun direta hala’o servisu ho voluntáriu.
“Ami simu ona pose husi Prezidente autoridade Kovalima ne’ebé ekipa servisu ho karakter voluntáriu. Ekipa sei elobora planu no fasilita formasaun no seluktan”, nia informa.
Membru ne’ebé simu pose mak hanesan husi Sesaun Lojístika, Salva no Buska, Alerta sedu no seluktan hodi responde ba dezastre naturál.
Jornalista:Celestina Teles
Editór :Rafael Ximenes de A .Belo
