DILI, 24 Februari 2025 (TATOLI)—Parlamentu Nasionál (PN) liuhusi sesaun plenária segunda ne’e, aprova votu louvor no agradesimentu ba asaun husi Monseñor Marco Sprizzi iha Timor-Leste ho votu a-favór 50 kontra 0 no abstensaun 0.
“Ne’ebé votu louvor no agradesimentu pasa por unanimidade”, Prezidente Parlamentu Nasionál, Maria Fernanda Lay, fó sai iha sala plenária.
Tuir testu votu louvor no agradesimentu ho númeru 3/2025 ne’ebé Sekretária Meza PN, Virgina Anabelo, lee sai iha plenária katak, desde nia to’o Timor-Leste iha 2019, Monseñor Marco Sprizzi, dedika no aprofunda lasu istóriku entre Santa Sé no Timor-Leste ne’ebé remonta misionáriu domínikadu dahuluk iha sékulu XVI.
Ninia atuasaun reforsa relasaun deskrita hanesan familiar enraizada liu iha sékulu lima partilla valór hanesan justisa sosiál, solidariedade no fraternidade.
Monseñor Marco Sprizzi destaka ba apoiu Igreja lokál, promove diálogu inter-relijiozu no asaun konkreta iha área edukasaun no serbisu sosiál, sempre aliña ho prinsípiu morál Igreja Katólika.
Durante ninia misaun konsege konkretiza projetu estruturante ba futuru ita-nia nasaun, hanesan estabelesimentu Nunsiatura Apostólika iha Dili, fundasaun Universidade KatólikaTimorense São João Paulo II no kriasaun Tribunál Eklesiástiku.
Monseñor Marco Sprizzi destaka mós husi apoiu ita-nia juventude, insetiva programa edukasaun integral no kombate flagelos hanesan violénsia entre ne’ebé foun, ho ninia inisiativa oioin valoriza dignidade umana no koezaun sosiál, sempre aliña ho vizaun Papa Francisco.
Ho importánsia realiza Monseñor nian afirma importante durante ninia estadia nu’udar experiensia domin ba timoroan demostra ninia profunda ligasaun ba ita-nia povu.
Louvor ne’e mós ba ninia partisipasaun iha preparasaun vizita Santu Padre iha setembru 2024, momentu ne’ebé konstitui marku istóriku ba Timor-Leste.
Monseñor Marco Sprizzi, partisipa iha esforsu lojístiku no diplomátiku, ho estreita kolaborasaun ho Governu Timor-Leste, kontribui ho ninia extraordináriu labor husi éxitu vizita Amu Papa nian.
Akontesimentu istóriku intensifika ita-nia orgullu hanesan mós projeta Timor-Leste iha senáriu internasionál ho vizibilidade, reafirma papél fé Katóliku, enkuantu pilár estruturante ita-nia identidade.
Husi méritu esesional oioin, Deputadu sira iha PN fó lovour no agradesimentu ba Monseñor Marco Sprizzi ninia serbisu inkansável fortalese aliserse nasaun no onra valór justisa, pás no fraternidade.
Ninia exemplu moris nu’udar jenuína entrega ba Timor-Leste, nasaun ne’ebé ninia própria liafuan ‘tama ba nia fuan ne’ebé nunka sai’, kontinua gia timoroan iha dalan dezenvolvimentu integral no armónia sosiál.
Nune’e, PN reuine iha sesaun plenária, expresa ninia profundu louvor no agradesimentu ba ninia asaun dezenvolve husi Monseñor Marco Sprizzi iha Timor-Leste.
Deputadu proponente ne’ebé aprezenta votu ne’e husi Patrocínio dos Reis Fernandes (CNRT), Alexandrino Afonso Nunes (PD), Maria Angelica Rangel da Cruz (Fretilin), Maria Angelina Sarmento Lopes (PLP no Antonio Verdial de Sousa (KHUNTO).
Iha intervensaun, deputadu bankada Governu husi CNRT, Romerio Moises, hato’o apresiasaun ba partisipasaun Monseñor Marco Sprizzi nian iha nasaun ida ne’e nia dedikasaun tomak ne’ebé fó ba Igreja Katólika haburas tan fiar ne’ebé mak timoroan ne’ebé maioriatariamente Katólika.
Deputada opozisaun husi Fretilin, Lidia Norberta, fó apresiasaun ba votu ne’e no importante tebes ba Monseñor Marco Sprizzi tanba ninia papél ida oinsá liga Igreja Katólika ho Timor-Leste. Monseñor buka konjuga kooperasuan ho Estadu Timor, ninia papel esensiál seluk mak akollamentu ba vizita Papa Francisco mai Timor, no fasilita ita-nia atuál Kardeál Dom Virgílio do Carmo, bá Vatikanu hodi simu votu hanesan Kardeál TL ba dahuluk.
Enkuantu, iha segunda ne’e Prezidente Parlamentu Nasionál, Maria Fernanda Lay, akompaña husi líder bankada parlamentár sira hala’o enkontru ho Monseñor Marco Sprizzi iha PN, hodi hato’o despedida.
Núnsiu Apostóliku Vatikánu iha Timor-Leste, Monseñor Marco Sprizzi, hafoin hala’o misaun iha país durante tinan hitu, nu’udar reprezentante Santa Sé.
Notísia relevante: Monseñor Marco Sprizzi despede Primeiru-Ministru hafoin termina
Jornalista : Nelson de Sousa
Editora : Rita Almeida
