VIETNAME, 25 Fevereiru (TATOLI)—Prezidente Repúblika, José Ramos Horta, tersa ne’e, hala’o enkontru bilaterál ho Primeiru-Ministru Repúblika Sosialista Vietname, Pham Minh Chinh, iha Otél Meliá.
Notísia Relevante: PR Horta apresia Vietname apoiu Timor-Leste adere ba ASEAN
Iha enkontru ne’e, Xefe Governu Repúblika Sosialista Vietname, Pham Minh, elojía Timor-Leste nia determinasaun no esforsu sira iha implementasaun nia ‘Road Map’ ba adezaun tomak ba ASEAN hodi reafirma Vietname nia apoia konsisténsia ba Timor-Leste nia adezaun ba ASEAN.
Xefe Estadu Timor-Leste no Xefe Governu Vietname reafirma hametin konfiansa politika liuhusi interkámbiu no enkontru sira iha nivel hotu-hotu, aleinde ne’e halo promosaun ba relasaun ekonómiku entre Timor-Leste ho Vietname.
Horta ho Pham Minh Chinh mós konkorda atu habelar kooperasaun iha área xave sira hanesan seguransa, defeza, informasaun no komunikasaun, edukasaun no formasaun.
Sira na’in-rua iha kompromisu atu utiliza ho efetivu tendénsia emerjente sira hanesan ekonomia verde, enerjia moos no inovasaun enkuantu promove interkámbiu entre ema sira liuhosi turizmu no interasaun kulturál sira.
Iha biban ne’e, Xefe Estadu José Ramos Horta husu atu fahe nia esperiénsia iha área oioin hansan harii polítika no estratéjia sosioekonómiku, apoia Timor-Leste iha área sira-ne’ebé Vietname iha forsa, hanesan agrikultura, seguransa ai-han, ekonomia dijitál no dezenvolvimentu infraestrutura inklui aumenta investimentu iha Timor-Leste.
Horta rekoñese susesu sira Vietname nian no komenta katak Vietname mak poténsia boot ida-ne’ebé iha relasaun di’ak ho ema hotu, no tenke serbisu hamutuk ba benefísiu nasaun rua nian.
Aleinde ne’e, Horta mós ko’alia kona-ba fundu soberania ne’ebé jere ho di’ak katak presiza nafatin diversifika investimentu sira-ne’ebé halo liuhosi fundu ne’e.
Laureadu Nobel da Paz ne’e afirma, Vietname mak fatin ne’ebé atrativu ba investimentu iha ne’ebé bele uza fundu soberanu, nune’e tenke iha delegasaun ida husi Vietname atu diskute kona-ba kooperasaun iha área sira hanesan mina no gás, estabelese sentru finanseiru sira.
Jornalista : Sérgio da Cruz
Editór : Cancio Ximenes
