DILI, 26 Fevereiru 2025 (TATOLI) – Governu autoriza realizasaun despeza ho montante millaun $15 relasiona ho atribuisaun subvensaun anuál ida ba Konferénsia Episkopál Timorense (CET, sigla portugés), ne’ebé hala’o durante 2025.
Tuir nota husi Governu, subvensaun anuál ba CET ne’e sei realiza tuir akordu ne’ebé asina ona iha loron 14 Agostu 2015 entre Timor-Leste no Santa Sé, nomós Akordu-Kuadru ne’ebé asina iha loron 16 Juñu 2017 entre Governu no CET.
Iha akordu ne’e prevee kontribuisaun anuál ida, tuir disponibilidade finanseira Governu nian ba atividade ho karáter sosiál, edukativu no governu ekleziál Igreja Katólika nian.
Lembra katak Vise-Primeiru-Ministru no Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano ‘Assanami’ Sabino no Pro-Prezidente CET, Dom Virgílio Kardeál do Carmo da Silva, asina ona iha Fevereiru tinan kotuk akordu subvensaun montante millaun $15 hodi finansia atividade igreja iha Timor-Leste.
Akordu ne’e prevee katak pelumenus husi valór subvensaun 50% utiliza ba objetivu sira ho karáter edukativu no pelumenus 25% utiliza ba objetivu ne’ebé ho karáter sosiál. Prevee mós katak la liu husi valór 15% sei utiliza ba objetivu governu ekleziál nian no másimu 10% sei gasta ba jestaun subvensaun ne’ebé fó.
Notísia relevante: Governu-CET asina akordu subvensaun millaun $15 finansia atividade igreja
Jornalista: Arminda Fonseca
Editora: Maria Auxiliadora
