KOVALIMA, 28 fevereiru 2025 (TATOLI) – Projetu Planeamentu Integradu Dezenvolvimentu Munisipál (PDIM) ne’ebé implementa iha 2024 hamutuk ualu, husi númeru ne’e, projetu haat finaliza ona no haat seidauk finaliza tanba empreza hasoru difikuldade hanesan klima no kondisaun estrada la di’ak.
“Ita tama ona iha faze retensaun 10%, ita sei hein lai to’o fulan haat, hafoin ita sei entrega tan projetu PDIM haat, tanba projetu haat seluk ne’ebé finaliza sedu no empreza sira entrega ona iha 2024”, Diretór Servisu Munisipál Planiamentu Integradu no Dezenvolvimentu, Carlito Barros dos Reis, relata ba TATOLI, iha resintu AMK, ohin.
Dirijente ne’e informa, autoridade Kovalima liuhusi Servisu Munisípiu PDIM inplementa Projetu ualu, husi projetu ualu ne’e projetu haat entrega ona haat mak seidauk entrega, tanba empreza hasoru difikuldade hanesan kondisaun estrada aat no klima. Nune’e nia garante marsu 2025 ne’e empreza haat ne’ebé implementa projetu PDIM haat ne’ebé mak seidauk konsege entrega iha 2024.
Atu implementa ba projetu PDIM, bazeia ba kontratu durasaun tempu empreza sira ne’ebé implementa projetu PDIM ualu durante fulan lima ne’ebé hahú implementa iha fulan-agostu 2024 sei finaliza iha dezembru 2024 ne’e maibe balun seidauk finaliza.
Empreza haat seluk ne’ebé seidauk konsege finaliza implementa projetu PDIM haat, iha 2024 mak hanesan empreza Queenzha Falov Unipesoal Lda harii merkadu iha postu Suai Suku Beco verba orsamentu $ 137,277.14, kustu kontratu $ 120,118.70.
Empreza Bend Maha Male Unipesoal Lda harii rezidénsia ba médiku, iha suku Holpilat $ 473,657.35 kustu konstratu $413,144.25 la garante atu finaliza nune’e tau orsamentu reapopriasaun iha 2025 nune’e bainhira finaliza bele halo pagamentu.
Empreza Taroman Lakfa Unipesoal Lda rekonstrusaun Jardín foho Lakirin suku Holpilat postu Maucatar $ 155,798.80 kustu kontratu $ 140,219.00 no kompañia Mandarin Unipesoal Lda halo konstrusaun salaun enkontru postu administrativu Fohorem $ 132,923.43 ho kustu kontratu $ 116,397.52.
Projetu PDIM haat ne’ebé mak empreza sira finaliza ona iha 2024 ne’e mak hanesan, Empreza Savi Guju Unipesoal Lda halo konstrusaun morru haleu edifísiu obra públika ho nia orsamentu husi PDIM $ 83,44.47, ho nia kustu kontratu $ 72,600.00, Empreza Jino Linda Unipesoal Lda, konstrusaun kanál irigasaun Bauraikun iha aldeia Kulu-oan Suku Tashilin, postu Zumalai ho osan $ 192,141.00 ho kustu kontratu $ 167,420.90.
Empreza feto lima harii Eskola Bázika Filiál, Suku Matai, Postu Maucatar ho verba $ 87,931.39 nia kustu kontratu $ 76,921.36 no Tofranditar Unipesoál Lda halo Konstrusuan laboratóriu Sentru Saúde Komunitáriu(SSK) Zumalai, iha suku Zulo $ 87,022.60 ho nia kustu kontratu ho empreza $ 86,121.61.
Jornalista:Celestina Teles
Editór: Rafael Ximenes de A. Belo
