DILI, 06 Marsu 2025 (TATOLI)-Ministériu Edukasaun (ME) liuhusi nia Diresaun Gabinete Unidade Kurríkulu Nasionál, no Sentru Imprensaun prodús ona kaderneta eskolár kuaze rihun 150 ba nível eskolaridade.
“Ita prodús ona iha sentru imprensaun nian iha Komoro, nune’e ita prodús ba ensinu pre-eskolár prodús rihun 30-resin, ba ensinu báziku primeiru no segundu siklu rihun 40, ba terseiru siklu rihun 40 no mós sekundáriu jerál rihun 40”, informa Koordenadór Gabinete Unidade Kurríkulu Nasionál, João Maupelu, iha salaun City8 Manleuana, ohin.
Nia dehan tinan ne’e projesaun ne’ebé iha mak bazeia ba númeru alunu, nune’e kada tinan prodús dala rua, inisíu tinan letivu no tinan ne’e nia rohan.
“Ita halo pakotemente hotu ona no hein distribui de’it ona. Ita prodús hanesan ne’e tanba inisíu hodi simu alunu foun no tinan nia rohan hein hodi projeta ba alunu foun ne’ebé atu tama”, nia dehan.
Tempu badak Ministériu Edukasaun distribui ba Servisu Edukasaun Munisipál depois kontinua ba eskola sira iha territóriu.
Notísia relevante: Edukasaun munisípiu Dili presiza kaderneta eskolár 5.000
Jornalista : Osória Marques
Editora : Rita Almeida
