DILI, 12 Marsu 2025 (TATOLI) — Governu liuhusi Ministériu Edukasaun (ME) fasilita formasaun espesializada ba direjente eskola hamutuk 107 iha Edukasaun Manatutu.
Objetivu husi formasaun ne’e atu kapasita no hasa’e koñesementu dirijente sira-nian oinsá hatutan fila-fali ba manorin sira oinsá kona-ba hanorin estudante iha prosesu aprendizajen.
Matéria ba formasaun ne’e importante tebes ba dirijente eskola sira hotu iha Edukasaun Manatutu nian, nune’e sira bele jere eskola, tanba eskola ne’e hanesan instituisaun ida ne’ebé presiza iha jerente ida hodi jere no tau matan ba funsionamentu eskola.
Nune’e mós implementasaun kurríkulu, prosesu avaliasaun ba ensinu aprendizajen, nune’e prosesu sira hotu iha eskola bele la’o ho di’ak
“Ita-nia Ministériu Edukasaun fó fasilita formasaun iha área Jestaun Administrasaun Eskolár, Lideransa Eskolár, Jestaun Finanseiru, Lejizlasaun, Tekinolojia Informasaun no Komunikasaun Nível Bázika, Kurríkulu Eduksaun no Fraternidade Umana ba ita-nia direjente eskola sira”, Diretór Servisu Edukasaun Munisípiu Manatutu, Patrício da Cruz Quintão, hatete, iha Vila Verde, kuarta ne’e.
Nune’e iha segunda liubá, Ministra Edukasaun, de Dulce de Jesus Soares, halo abertura ona ba formasaun referida, ne’ebé hahú iha loron segunda to’o sábadu semana ne’e.
Entretantu Ministra Edukasaun, Dulce de Jesus Soares, hateten, formasaun ne’e fó de’it ba dirijente eskola sira hanesan, Diretór Eskola, Adjuntu, Koordenadór Filiál no mós Koordenadór Pré-Eskolár nian no iha formasaun ne’e sei hetan matéria sira hanesan administrasaun eskolár, jestaun eskolár, fraternidade umana no kurríkulu.
“Formasaun ne’e la’o durante semana ida nia-laran ho objetivu mak, iha tinan 2024 ita nomeia kargu diretiva sira, hanesan diretór, adjuntu, koordenadór filiál no koordenadór pré-eskolár, sira ne’e foun, tanba ne’e formasaun ne’e hanesan bukae ida ba sira, nune’e bele iha koñesimentu hodi jere eskola ne’e ho di’ak”, Ministra dehan.
Jornalista: Osória Marques
Editór: Evaristo Soares Martins
