DILI, 17 Marsu 2025 (TATOLI)—Sekretáriu Jerál Federasaun Futeból Timor-Leste (FFTL), José Adilson Ribeiro, husu ba jogadór ekipa selesaun nasionál atu iha nafatin vontade hodi prepara-aan atu kompete iha jogu Jogu Kualifikasaun Tasa Ázia AFC 2027, hodi hamorin Timor-Leste nia naran.
Notísia Relevante: Ekipa selesaun nasionál halo preparasaun iha Malázia atu hasoru Lebanon-Tazakistan
Sekretáriu Jerál FFTL hasoru malu ho ekipa selesaun nasionál Timor-Leste ne’ebé halo hela preparasaun iha Malázia iha 16 Marsu 2025, atu haree mós oinsá kondisaun sira-ne’ebé durante ne’e hala’o preparasaun no fó mós motivasaun atu kontinua iha vontade no esforsu hodi bele tane Timor nia dignidade liuhusi futeból.
“Rreprezenta Prezidente FFTL, Nilton T. Gusmão dos Santos hakarak husu ba jogadór sira kuidadu aan no prepara aan didi’ak antes atu ba partisipa jogu entre Timor ho Tazakistaun,” Adilson tenik liuhusi nota ne’ebé Agência TATOLI asesu husi media FFTL, ohin.
NNia husu ba jogadór sira atu lalika preokupa no rona informasaun sira-ne’ebé espalla iha mídia sosiál ka husi ema ruma ne’ebé ladún fó motivasaun ba ekipa selesaun nasionál, dalan di’ak-liu mak foku de’it ba jogu ne’ebe tuir mai.
“Ikus liu, agradese ba ekipa selesaun nasionál ninia preparasaun ne’ebé durante hala’o ona iha Timor no to’o mai iha Malázia, husu kontinua forsa no prepara aan didi’ak antes atu ba partisipa jogu entre Timor ho Tazikistaun,” nia tenik.
Jogu Kualifikasaun Tasa Ázia AFC 2027, ne’ebe Timor-Leste sei joga hasoru nia adversáriu Tazikistaun iha loron 25 Marsu 2025.
Jogu kualifikasaun Tasa AFC 2027 ronde datoluk Timor-Leste iha Grupu A hamutuk ho Tazikistaun, Maldovas no Filipina.
Nasaun tolu ne’e, daudaun iha kalsifikasaun FIFA ne’ebé aas liu Timor-Leste, Tazikistaun iha fatin 104, Filipina iha fatin 150, Maldivas iha fatin 162 no Timor-Leste okupa iha fatin 197.
Iha jogu primeiru, Timor-Leste sei kontra uluk ekipa ne’ebé forte liu iha grupu A mak Tazikistaun.
Jornalista : Hortencio Sanchez
Editór : Cancio Ximenes
