DILI, 07 Abríl (TATOLI)—Tribunál Judisiál Primeira Instánsia Dili (TJPID), segunda ne’e, kontinua halo julgamentu ba kazu José Bernardo nia mate iha sela Komandu Polísia Nasionál Timor-Leste (PNTL) Munisípiu Dili, tinan 2022.
Iha audiénsia julgamentu ne’e, Tribunál Koletivu rona depoimentu husi sasin Filomena Esperança da Costa.
Iha sala julgamentu laran, sasin fó nia depoimentu katak nia simu informasaun husi matebian nia inan Regina de Jesus Soares katak lori hela bee ho autan kose isin ba José Bernardo iha sela detensaun PNTL Kaikoli.
Sasin haktuir bainhira nia to’o iha Komandu PNTL iha tuku neen loraik no husu ba arguidu TV ne’ebé halo funsaun hein sela.
Maibé, momentu ne’e, arguidu TV túr hela iha karreta leten hodi fuma sigaru no arguidu TV ho lian maka’as hasai liafuan ba sasin katak lori bee ho autan ba tau iha meza leten, tanba ne’e sasin lori bá tau iha meza leten. Bainhira sasin bá tau autan no bee iha meza leten, sasin sei hetan José Bernardo no matebian José Bernardo momentu ne’e sei konversa ho sasin katak hakarak fila ona bá uma.
Hafoin rai tiha bee ho autan liu de’it minutu rua, sasin Filomena Esperança da Costa mós fila ona husi Komandu Dili bá uma no to’o tuku hitu kalan rona dehan José Bernardo hakotu ona iis (mate) ho meiu tara aan.
Nune’e mós, sasin Deolindo de Carvalho mós konfensa ba Tribunál katak nia laiha koñesimentu kona-ba polísia bá foti nia subriñu José Bernardo iha uma Audian. Iha tuku hitu kalan nia hakarak atu bá haree nia subriñu iha sela detensaun Komandu PNTL Dili atu hatene nia (José Bernardo) nia kondisaun, maibé hafoin atu bá haree nia subriñu iha sela detensaun Komandu PNTL Kaikoli. To’o iha-ne’ebá, husu polísia sira dehan José Bernardo mate ona ho tara aan.
Sasin deklara, hafoin rona tiha ida-ne’e, sasin ne’e husu polísia sira atu haree matebian José Bernardo maibé polísia sira la autoriza no sira fila bá uma hodi informa bá José Bermardo nia família sira.
Hafoin Tribunál rona tiha depoimentu husi sasin sira, Tribunál deside marka julgamentu ne’e bá loron seluk atu kontinua rona deklarasaun husi sasin sira seluk.
Jornalista: Natalino Costa
Esditór: Xisto Freitas da Piedade
