BAUKAU, 15 Abríl 2025 (TATOLI)—FALINTIL-Forsa Defeza Timor-Leste (F-FDTL), tersa ne’e, realiza retiru jerasionál iha Komponente Terrestre Baukau ho objetivu atu prepara líder instituisaun iha futuru.
“Istorikamente instituisaun F-FDTL inísiu hamriik iha ukun-aan ne’e maioria iha líder ne’ebé ho esperiénsia luta iha ai-laran, nune’e futuru presiza líder ne’ebé iha nasionalizmu atubele konsolida inklui tenke líder ida forte no demokrátiku,” Xefe Estadu Maiór Jenerál F-FDTL, Tenente Jenerál Falur Rate Laek hateten iha Lanud, Baukau.
Tenente Jenerál esplika atividade referida orientadu ba membru F-FDTL hanesan ofisiál no superiór sira-ne’ebé tuir ona formasaun iha rai-li’ur no iha Institutu Defeza Nasionál (IDN).
Iha fatin hanesan, Ministru Defeza Kontra Almirante, Donaciano Costa Gomes “Pedro Klamar Fuik” konsidera futuru líder institusaun F-FDTL tenke iha domíniu kulturál liuliu iha kapasidade no koñesimentu nune’e bainhira foti desizaun di’ak ba kualker kooperasaun.
“Ha’u seidauk ko’alia kona-ba nova modalidade, tantu ida-ne’e dalaruma iha oportunidade mak ita ko’alia,” Pedro Klamar Fuik hateten.
Entretantu, oradór ba atividade retiru jerasionál referida mak Ministru Defeza, Pedro Klamar Fuik no jurista Avelino Coelho no partisipa husi membru F-FDTL kompostu husi kargu ofisiál no superiór sira.
Jornalista: Natalino Belo
Editór: Xisto Freitas da Piedade
