DILI, 15 Abríl 2025 (TATOLI) – Governu ho Fundasaun Klínika Bairru-Pité (FCBTL), Lanud, asina akordu anuál subvensaun públika 2025, hodi implementa programa prioritáriu sira ne’ebé FCBL prepara, iha salaun FCBTL, ohin.
Atividade asina akordu ida-ne’e, Governu liuhusi Vise Primeiru-ministru, Ministru asuntu sosiál no Ministru dezenvolvimentu rurál no abitasaun komunitária, Mariano Assanami Sabino, ho Prezidente FCBL, Inacio dos Santos, ho montante $500.000, hodi implementa programa prinsipál tolu hanesan halo konstrusaun ba morru protesaun, konstrusaun ba labaratóriu tuberkulojia no raiu-X, inklui aumenta ekipamentu ba fasilidade atendimentu pasiente.
Totál gastus ba konstrusaun sira-ne’e hamutuk $480.000 no restu halo pagamentu ba saláriu pesoál.
Vise Primeiru-ministru koordenadór asuntu sosiál, dezenvolvimentu rurál no abitasaun komunitária, Mariano Assanami Sabino, hateten, Governu iha responsabilidade para tau-matan no fó apoiu ne’e tanba mós previléjiu ba saudozu Dr. Daniel Murphy, husu atu kontinua nafatin servisu atu banati tuir lisaun ne’ebé maka Dr. Daniel Murphy husik hela.
“Nu’udar jerasaun foun kontinua servisu hamutuk nune’e klínika ne’e nafatin utíl, tau importante liu ba pasiente sira ne’ebé presiza halo tratamentu iha ne’e”, Vise Primeiru-ministru ne’e perante ba jornalista sira iha salaun enkontru FCBL, Dili, ohin.
Iha fatin hanesan, Koordenadór Gabinete Apoiu Sosiedade Sívil, Joaquim da Costa Freitas, informa katak iha tinan ida-ne’e liuhusi Komite Revizaun Orsamentu (KRO) aprova montante espesífiku ba Klínika Bairru-Pité hodi ezerse nia funsaun médika.
“Apoiu ida-ne’e konsidera hanesan ajuda umanitária, la’ós de’it klínika Bairru-Pité mak sai hanesan parseiru maibé iha mós organizasaun balun ne’ebé kontinua sai parseiru. No, husu parséria klínika sira atu iha koordenasaun ba asisténsia moras”, koordenadór ne’e anunsia.
Autoridade ne’e mós nafatin husu atu kontinua halo servisu sira-ne’ebé mak dalaruma sai ezijénsia ba pasiente atu servisu labele haree ba oras maibé servisu tuir nesesidade ne’ebé iha. Espera katak la’ós de’it fó asiténsia maibé iha kategorizasaun ba alokasaun balun ne’ebé liga ba ho hadi’a fasilidade klínika.
Enkuantu, Prezidente FCBL, Inacio dos Santos, agradese Governu tanba aloka ona orsamentu ba iha klínika referida tanba iha klínika ne’e fó asiténsia ba moras HIV-SIDA, tuberkulozia, trata má nutrisaun ba inan isin-rua no mós fó asiténsia ba konsulta baibain.
“Orsamentu ne’ebé mai, ita sei aloka ba konstrusaun tolu, konstrusaun ne’ebé iha tinan tolu liubá ita halo dezeñu ona no hetan mós aprovasaun husi Ajénsia Dezenvolvimentu Nasionál (ADN); morru hale’u ba klínika Bairu-Pité, konstrusaun mós ba sala tuberkolojia no sala emerjénsia, inklui laboratóriu tuberkulozia no raiu-X”, nia rekorda.
Líder másimu FCBL, Inacio dos Santos, informa katak iha tinan ida-ne’e sira sei konsentra liubá konstrusaun tanba iha klínika Bairru-Pité iha fasilidade ne’ebé ladun sufisiente. Entaun, konstrusaun ne’e sei hahú iha fulan-Juñu no sei remata iha fulan-Dezembru tinan ne’e. No, konstrusaun ida-ne’e sei loke ba konkursu públiku no oferese de’it ba empreza lokál.
“Ho orsamentu ne’ebé mak iha, ami sei esforsu mellora servisu ho di’ak no fó atendimentu ne’ebé kualidade ba pasiente sira bainhira mai halo tratamentu iha ne’e”, nia garante.
Iha seremónia selebrasaun asina akordu subvensaun ne’e, Vise Primeiru-ministru Mariano Assanami mós aproveita okaziaun hodi halo observasaun ba Klínika Bairru-Pité, Lanud, Dili. No, planeia hakarak transforma naran husi klínika ne’e ba Fundasaun Klínika Bairru-Pité Dr. Daniel.
Jornalista: Alexandra da Costa
Editór: Rafael Ximenes de A. Belo
