DILI, 19 Abríl 2025 (TATOLI)- Reitór Universidade Orientál Timor Lorosa’e (UNITAL), Claudino Ninas Nabais, dehan iha kompromisu kontinua fasilita dosente sira atu bá hasai kursu doutoramentu atu hasa’e kualidade prosesu apredizajen iha universidade referidu.
Iha tinan kotuk, Reitór ne’e dehan dosente na’in-23 ba Universidade Hasanuddin Indonézia atu hasai kursu dotouramentu.
Dosente na’in-23 ne’e partisipa estudu ka aula liuhusi tipu online no offline. Estudante sira ne’ebé partisipa aula Online mak sira iha ne’e, hafoin semana ida no rua bá iha sira Universidade Hasanuddin Indonézia, nune’e sira kontinua hanorin estudante sira, maibé balun ne’ebé offline tenke ba iha sira nia universidade.
Dosente sira ne’ebé estudu iha fakuldade direitu hamutuk na’in-rua, siénsia sosiál na’in-tolu, ekonómia na’in-hitu, siénsia edukasaun na’in-rua, agrikultura na’in-ualu no tékniku enjenária na’in-10.
“Maibé ami susar uitoan mak iha área saúde ne’e tanba maestradu sira ne’e kuandu ramata sira nia estudu iha Indonézia sempre ba iha Governu no ba iha instituisaun privadu sira, entaun ita iha limitasaun ba dosente saúde liuliu ba enfarmajen, análiza laboratóriu no nutrisaun”, Dehan nia ba TATOLI,I.P, iha nia kna’ar fatin,Bekora-Dili, ohin.
Nia dehan bolseiru sira ba doutoramentu hahú tiha ona iha tinan kotuk no balun besik ramata. Husi menus dosente ba área referida mak sai kestaun ida ba UNITAL tanba kada tinan UNITAL simu estudante 500-resin.
“Daudaun ne’e ami simu estudante 500 no kada tinan dala ruma liu 500. Entaun liu tiha númeru dosente ne’ebé iha. Entaun esforsu ne’ebé mak ami iha atu kria dosente permanente. Tanba enfarmajen nian iha ne’e parte tempu de’it, no doutor balun husi klinika no Governu nian mak mai hanorin. Nune’e ami nia planu atu reforsa dosente sira ne’e ami halo kooperasaun ho universidade iha Indonézia”, nia dehan.
Kona-ba orsamentu doutoramentu nian ne’e, nia dehan sira hetan husi Fundu Dezenvolvimentu Kapitál Umanu (FDCH-sigla Portugés) no balun mai husi universidade rasik, maibé husi universidade ne’e rasik livre de’it ba propina no dormitóriu, ba publikasaun peskiza ne’e responsabilidade estudante ida-idak ninian.
“Universidade mós iha responsabilidade fó insentiva kada semester depende ba sira nia kategoria. Universidade fó $500 kada semeter maibé sira nia saláriu ne’e kontinua la’o nafatin. Sira nia saláriu la’o bazeia ba sira-nia esperiénsia no grau akadémiku”, nia dehan.
Estudante ativa iha UNITAL hamutuk 6.711 no dosente maestradu 88 no dosente doutoramentu iha na’in 9. Daudaun doutoramentu husi 9 ne’e sei aumenta tan ba na’in 32. Tanba sira na’in 23 sei iha prosesu estudu nia laran no tinan ne’e bele finaliza ona sira-nia estudu.
Notisia relevante:Tinan ne’e, UNITAL hetan subvensaun públiku rihun $105
Jornalista: Osória Marques
Editór: Florencio Miranda Ximenes
