BOBONARU, 22 Abríl 2025 (TATOLI)—Prezidente Autoridade Munisípiu Bobonaru (PAM), Alexandre Pires, hamonu mata-ween bainhira rona lia-rekadu husi Vitikanu katak líder uma-kreda mundiál, Papá Fransisco mate husik ona mundu iha segunda (21 Abríl 2024), tuku 07h35 dadeersan oras Vatikanu.
Notísia Relevante: Governu-Igreja asina livru kondolénsia kona-ba Papa Francisco nia falesimentu
Alexandre Pires ho sentimentu emosinál hamonu ‘mata-ween’ tanba hanoin hikas memória iha tinan kotuk ho nia espoza simu direta bensaun no tersu husi Papa Francisco, hafoin atera (mendarat) iha aeroportu Internasionál Prezidente Nicolau Lobato, Dili, iha 09 Setembru 2024.
“Ha’u sente triste bainhira hodikalan ha’u rona, aleinde hanesan Prezidente Autoridade no pesoál ne’ebé mak simu bensaun direta husi Papa Francisco. Ha’u triste tanba lakon aman mundiál ida iha ita-nia leet. Tanba ne’e mak ohin antes atu enkontru ha’u konvida maluk hotu-hotu hamriik atu hasa’e ita-nia orasaun, ita-nia kondolénsia ba Sua Santidade Papa Francisco nia mate,” nia hateten ba jornalista sira iha salaun Maria-Tapo, tersa ne’e.
Nia lori komunidade Munisípiu Bobonaru nia naran hato’o sentimentu kondolénsia ba Uma -kreda munidiál no sente tebes lakon líder mundiál ida-ne’ebé deklara katak nia fuan no laran monu tebes ba Povu Timor-Leste.
Nia hanoin hikas katak, iha momentu nia haree no Papa Francisco fó bensaun ba nia ne’e, nia hanesan haee direta Papá Fransisco ne’e senté hanesan Jesuss mak tun mai mundu.
“Ami hotu tanis, depois Santu Padre hakat mai, ami Prezidente Autoridade hotu-hotu ho espoza hotu-hotu, ami hola bensaun. Aleinde ne’e, Santu Padre fahe tersu ba ami, espesiál ba ami. Ha’u hanoin ida-ne’e, durante ha’u-nia morís sei lahetan tan prezente direita husi Papa Fransisco,” nia hateten hodi hamoos nia mata-ween ho liman tanan.
Ho nune’e, nia apela no orienta ona Diresaun Servisu Munisipál, Administrasaun Postu Administrativu no suku 50 atu hasa’e fó omenjaen ba Papa Francisco nia mate hodi hasa’e bandeira meia-aste iha edifisíu publiku sira durante loron hitu (7) nia laran.
Notísia Relevante: Governu Timor-Leste dekreta lutu nasionál loron-tolu ba falesimentu Jorge Sampaio
Jornalista : Sergio da Cruz
Editór : Cancio Ximenes
