OEKUSI, 28 Abríl 2025 (TATOLI) – Abitante sira iha suku Bobomeo, sub-rejiaun Oésilo, husu ba Autoridade Rejiaun Administrativa Espesiál Oekusi Ambeno (RAEOA) aselera projetu perfurasaun bee-moos iha mota Noel-Ekat, nune’e bele distribui ba komunidade.
Xefe suku Bobometo, José Labi Caet, informa katak projetu ne’e konstrui iha mandatu autoridade anteriór nian iha 2020 atu fornese bee-moos ba abitante sira iha aldeia Usapikolen, Saben, inklui aldeia Tumin no Nonquikan pertense ba suku Bobometo, maibé to’o agora seidauk kanaliza ba komunidade.
Notísia relevante:Mira Mar finaliza projetu perfurasaun sistema bee-moos iha Oésilo
“Ha’u foin eleitu iha tinan kotuk, projetu ne’e halo antes kedas. Tanba saida mak to’o ohin loron seidauk kanaliza? Komunidade sira presiza bee-moos, ami husu konsidera ami-nia rekomendasaun ne’e”, José Labi Caet tenik iha ámbitu diálogu ho autoridade RAEOA iha sede suku Bobometo.
Iha fatin hanesan, Xefe Aldeia Usapikolen, Leonardo Tebi, hateten tinan lima ona sira la hetan bee, tanba perfurasaun bee-moos iha mota Noel-Ekat ne’e maski tanke distribuisaun no kanu sira instala ona bá to’o edifísiu postu administrativu Oésilo, instalasaun tanke ho nia polypipe dada husi uma oin sira, maibé bee-moos seidauk iha.
“Ami husi Governu gasta osan ne’e atu povu uza ka ou estraga de’it osan? Ikus mai rezultadu laiha, ami husu tenke rezolve”, nia kestiona.
Notísia relevante: SAS Oé-Cusse instala bee-moos iha fatin lima ho millaun $1-resin
Hatán ba rekomendasaun sira-ne’e, Prezidente Autoridade RAEOA, Rogério Lobato, promete sei koordena ho parte Servisu Água no Saneamentu (SAS), nune’e bele identifika hodi aposta iha planu tuirmai.
“Ida-ne’e mak ohin ami tun mai, atu rona direita imi-nia preokupasaun sira. Asuntu ne’e kle’ur ona, ohin mak komunidade sira foin levanta, maibé ha’u promete ba imi, ita sei buka atu hadi’a. Sira SAS, ha’u sei haruka sira mai haree atu persiza saida, ita-bele tau osan hadi’a iha tinan oin ou tinan ne’e, tanba ne’e atu fó bee ba imi”, dehan.
Notísia relevante: Rogério Lobato promete rezolve problema infraestrutura bázika iha sub-rejiaun sira
Perfurasaun sistema bee-moos ne’e ezekuta husi empreza Mira Mar Unipessoal Lda, ho valór orsamentu hamutuk $561.861,66. Verba ne’e aloka husi Orsamentu Jerál Estadu 2020.
Jornalista: Abílio Elo Nini
Editora: Maria Auxiliadora
