DILI, 17 Maiu 2025 (TATOLI)—Restaurasaun Independénsia Timor-Leste ba dala-23, 20 Maiu 2002-20 Maiu 2025, Ministériu Edukasaun (ME), presiza mellora infraestrutura no aumenta rekursu umanu iha eskola Ensinu Báziku (EB).
Estudante husi Ensinu Báziku Filiál Bebonuk, Livinia Silva, hateten importante ba Ministériu Edukasaun atu hadi’a asuntu Edukasaun ne’e tanba Timor-Leste restaurasaun independénsia tinan ba dala-23 ona.
“Restaurasaun independénsia ba dala-23 ona ne’e Ministériu Edukasaun presiza tau-atensaun ba infraestrutura eskolár no fasilidade seluk. Iha ami-nia eskola ne’e presiza aumenta ami-nia saladeaula, livru no profesór maibé saladeaula mak menus liu,” nia dehan ba Tatoli, iha eskola EB Filiál, Bebonuk, Dili, sábadu ne’e.
Estudante Eskola Ensinu Báziku Sentrál (EBC-língua portugés), 10 Dezembru, Komoro, Merita Soares, informa Timor-Leste restaurasaun independénsia ba dala-23 ona, tan ne’e husu ba Ministériu Edukasaun atu fasilita guarda seguransa ba eskola referida nune’e bele halo seguransa ba eskola ne’e no evita violénsia.
“Ha’u-nia lia-menon ba Ministériu Edukasaun mak ne’e. Ami EBC 10 Dezembru ne’e fasilidade kompletu, manorin mós komplete no hanorin mós di’ak loos, maibé seguransa ba eskola mak sei falta. Tanba ha’u sente katak eskola ne’e ho eskola seluk mak sei iha problema barak,” nia rekomenda.
“Tuir ha’u-nia hanoin, loron 20 Maiu ne’e Loron Restaurasaun Independénsia Timor-Leste nian. Iha loron 20 Maiu 2002 mai iha 2025, halo tinan 23 ona. Nune’e, tuir ha’u-nia hanoin, restaurasaun ne’e ita restaura ona ita-nia aan husi Indonézia ne’ebé okupa ita iha tinan 24,” nia dehan.
Iha sorin seluk, Estudante Ensinu Báziku Filiál Bidau Akadiruhun, Veléria da silva, dehan hanesan jerasaun kontinuadora, sente kontente hodi selebra Loron Restaurasaun Independénsia Timor-Leste.
“Loron Restaurasaun Independénsia 20 Maiu hanesan loron ne’ebé ita sai husi invazaun Indonézia nian nu’udár nasaun ne’ebé independente. Ha’u mós apresia tanba ita restaura independesia ba dala-23 ona no ita haree mudansa iha ita-nia rai laran aas tebes,” nia tenik.
Iha biban ne’e, nia solisita Ministériu Edukasaun atu fasilita fasilidade eskola. “Ami sei menus kadeira, meza, livru, manuál ba alunu no manuál profesór sira-nian,” Valéria haktuir.
Iha fatin hanesan, alunu Andre Cardoso, hateten loron 20 Maiu hanesan loron ne’ebé Timor kore-aan husi invazaun Indonézia.
“Maibé, husu Ministériu Edukasaun atu tau-matan ba fasilidade sira hanesan kazadebañu, ne’ebé daudaun ne’e ladi’ak. Nune’e mós husu atu aumenta mobiliáriu hanesan meza no kadeira tanba daudaun ne’e meza ho kadeira ne’ebé iha balun kondisaun ladún di’ak ona,” nia propoin.
Jornalista: Osória Marques
Editór: Xisto Freitas da Piedade
