DILI, 28 Maiu 2025 (TATOLI)–Autoridade Munisípiu Dili (AMD) koopera ho Autoridade Protesaun Sivíl (APC, sigla portugés) Dili no Likisá atu rezolve ahi suar iha lixeiru Tibar.
Prezidente Autoridade Munisípiu (PAM) interinu Dili, António Agosto Guterres, hateten, ekipa responsável la permite buat ne’e akontese iha lixeiru tanba ahi suar ne’e rezulta poluisaun ne’ebé bele estraga ambiente.
“Ita orienta ona ekipa Servisu Munisipál Água no Saneamentu (SMASA) atu serbisu iha ne’ebá tenke kuidadu no pontuál iha serbisu fatin, kontrola didi’ak para buat sira-ne’e labele sunu tan iha lixeiru atu labele afeta ba ambiente nomós ba komunidade ne’ebé hela iha Tibar,” PAM interinu informa ba Ajénsia TATOLI, iha edifísiu AMD, Matadoru, Kuarta ne’e.
Daudaun ne’e AMD serbisu hamutuk ho APC, Bombeiru Dili no Líkisá inklui SMASA atu hamate ahi iha lixeiru Tibar tamba ahi tama to’o área Tasi-tolu.
“Bainhira buat ruma akontese falla iha terrenu tenke hato’o lalais ho urjentemente para ita bele buka solusaun tanba AMD la la’o mesak no sira sempre la’o ho Governu sentrál tanba Dili besik liu Governu sentrál, entaun presiza iha komunikasaun, tanba bainhira laiha no tarde mak sei difikulta,” nia akresenta.
Notísia relevante : PN husu Autoridade Munisípiu Dili halo jestaun ba lixeiru Tibar
PAM internu dehan, daudaun ne’e sosiedade hahú kontribui no iha ona konsiénsia maski seidauk másimu.
“Agradese ba líder komunitária, sosiedade sivíl inklui ema hotu iha Dili tanba bele koopera di’ak no jestaun lixu iha Dili laran ladún sai problema ida-ne’ebé boot liu, aleinde ne’e ema mós la kestiona loron-loron ona,” nia katak.
Daudaun ne’e iha kamioneta hamutuk 75 kontinua asegura jestaun lixu iha postu haat iha Dili hanesan Dom Aleixo, Vera-Kruz, Na’in-Feto, Kristu Rei, ne’ebé hetan kontrola másimu husi ekipa SMASA ne’ebé halo resvista iha Tasi-tolu no Tibar.
Jornalista : Alexandra da Costa
Editora : Julia Chatarina
