BAUKAU, 04 Juñu 2025 (TATOLI)—Eskola Bázika Filiál (EBF) Bukoli, Postu Administrativu Baukau Vila, daudaun ne’e enfrenta menus profesór.
Koordenadora EBF Bukoli, Leonilda Boavida da Costa, esplika situasaun referida akontese tanba eskola ne’e iha estudante barak no profesór ne’ebé iha la sufisiente hodi koloka tuir sala aprendizajen.
“Ami-nia eskola menus profesór, nune’e halo oráriu fahe profesór la to’o, entaun sala-aula ida tau hamutuk estudante to’o ema na’in-56,” Koordenadora EBF hateten iha ninia kna’ar fatin, Bukoli, kuarta ne’e.
Leonilda haktuir, antes ne’e profesór iha eskola referida hamutuk na’in-20 maibé profesór tempu parsiál na’in-lima hafoin pasa iha bolsa kandidatu koloka ba eskola seluk, nune’e fó impaktu ba prosesu aprendizajen.
Atualmente, profesór hamutuk na’in-15 kompostu husi ativu na’in-14 no na’in-ida deskansa tanba kondisaun saúde. Aleinde ne’e, husi profesór ne’ebé iha, profesór na’in-lima ho idade reformada ona tanba ne’e futuru eskola ne’e sei enfrenta menus profesór.
Leonilda fundamenta, ho kondisaun referida parte jestór obrigada tenke akumula estudante kada síklu ne’ebé sala rua akumula ba sala-aula ida nune’e profesór ne’ebé iha bele prenxe prosesu aprendizajen.
“Tuir regra edukasaun, kada sala akumula estudante na’in-35, maibé iha-ne’e sala-rua ami akumula hamutuk ho estudante liu 50,” Leonilda akresenta.
Entretantu, EBF Bukoli hamutuk totál estudante 456 kompostu husi primeiro ano totál estudante na’in-64, segundo ano na’in-46, terceiro ano 57, quarto ano na’in-52, quinto ano fahe na’in-48, sesto ano estudante na’in-38, sétimo ano na’in-56, oitavo ano na’in-36 no nono ano 46.
Jornalista: Natalino Belo
Editór: Xisto Freitas da Piedade
