KOVALIMA, 09 Juñu 2025 (TATOLI) – Juís-sira ne’ebé presta sira-nia servisu iha Tribunál Primeira Instánsia Munisípiu Kovalima, la okupa rezidénsia juís ne’ebé mak Estadu prepara tanba seidauk iha fasilidade nune’e juís sira deside hela iha uma arrendada ka uma aluga (cost).
Juís Administradór Tribunál Primeira Instánsia Munisípiu Kovalima, Naasson Doutel Sarmento relata, razaun la okupa tanba rezidénsia juís ne’ebé Estadu prepara la iha fasilidade uma-laran, la iha bee no saneamentu no mós okupa rezidénsia sei ko’a osan alojamentu $300 husi juís sira.
“Ita iha rezidénsia ba juís, uma hamutuk hitu no uma ba ofisiál rua maibé juís sira la hela, tanba la iha fasilidade hanesan la iha bee-moos no fasilidade uma-laran la iha, ami inisiativa sosa rasik fasilidade uma-laran. Tuir orientasaun husi Prezidente Tribunál Rekursu tenke ko’a ami-nia subsídiu alojamentu $300”, Juís Administradór Tribunál Primeira Instánsia Munisípiu Kovalima, Naasson Doutel Sarmento hato’o ba jornalista sira, iha Tribunál Kovalima, ohin.
Ho desizaun husi Prezidente Tribunál Rekursu sesante, juís sira sente la justu, tanba ne’e mak juís sira ne’ebé presta servisu iha Tribunál munisípiu Kovalima deside buka komunidade nia uma uma aluga nune’e hodi presta servisu halo atendementu sidadaun sira iha Tribunál.
Juís administradór konta katak molok ne’e juís sira okupa maibé hafoin simu despaixu husi PTR sesante juís sira deside la hela iha rezidénsia ba juís sira ne’ebé Estadu prepara hahú iha 2019 to’o ohin loron nune’e juís sira hela de’it iha cost.
Ho juís ne’ebe la hela iha rezidénte husi Estadu hodi sai buka komunidade nia uma ho intensaun arrenda ba komunidade nia uma nune’e bele kontribui netik osan uitoan ba komunidade hodi bele sustensa sira-nia família uma-laran.
Hatan ba Kestaun ne’e, Prezidente Tribunál Rekursu, Afonso Carmona klarifika, nia parte sei halo estudu razaun saida mak juís sira lakohi hela iha rezidénsia ne’ebé mak Estadu prepara atu fasilia sira hala’o sira-nia servisu.
“Kona-ba rezidénsia ne’ebé abandona ha’u hanoin atu buka solusaun mak bainhira funsionáriu públiku mai hala’o vizita sira bele hela, maibé tenke selu hanesan ami mai, la presiza atu buka otél nune’e bele kontribui reseita ba Estadu”, nia esplika.
Ho solusaun ne’ebé mak Prezidente Tribunál Rekursu hanoin maibé PTR seidauk bele deside loloos tanba rezidénsia ba juís sira ne’e Estadu mak prepara maibé nia parte presiza halo komunikasaun ho finansa importante mak bele rezolve problema referidu tanba Estadu gasta osan.
Razaun juís sira la hela, kada fulan, juís sira iha osan alozamentu sei ko’a sira-nia osan alozamentu $300 bainhira juís sira hela iha uma aluga kada kuartu selu de’it $50.00, razaun seluk mós rezidénsia dook husi servisu fatin no bele mós la iha transporte atu fasilia juís sira hala’o servisu, la iha bee-moos, maibé PTR sei halo estudu.
Tuir dadus Estadu kontrui rezidente ba juís sira hanesan, iha Tribunál Baukau, Estadu prepara uma rua, Rejiaun Administrativa Espesiál Oe-kuse Ambeno (RAEOA) prepara uma ida no iha Kovalima uma hitu ba juís sira atu fasilita servisu autoridade judisiál sira ne’e .
Jornalista: Celestina Teles
Editór : Rafael Ximenes de A. Belo
