BOBONARU, 09 Juñu 2025 (TATOLI)—Sentru Atendementu Agrikultura Kuda Ulun Bobonaru (CAAKUB), segunda ne’e, halo pagamentu osan rihun $11,600 ba agrikultór hamutuk 20 ne’ebé foin lalais ne’e faan hare-lulit ba asosisaun ne’e ho presu kada kilograma sentavu $0,40.
Notísia Relevante: CAAKUB hahú tetu hare-kulit husi agrikultór sira iha Maliana-Kailaku
Prezidente CAAKUB, António Barreto, konfirma daudaun ne’e CAAKUB tetu ona hare-kulit ho totál kuantidade 25,470 husi agrikultor na’in-19 iha Maliana no na’in-ida (1) mai husi postu administrativu Kailaku.
“CAKBUK aplika sistema hahú loron segunda to’o kinta sosa ka rekolla hare-lulit no sesta ho sábadu loron ba halo pagamentu nian. Ida-ne’e la’ós ba foun ida tanba kada tinan ita sempre sosa hare-kulit. Entaun, ohin, ita halo pagamentu ba agrikultór na’in-20 ho totál orsamentu ne’ebé ita gastu ba sosa hare-kulit hamutuk rihun $11-resin,” Nia informa ba jornalista sira, iha nia kna’ar fatin.
Nia afirma, to’o agora CAAKUB sei mantein sosa hare-kulit ho presu anteriór no seidauk iha mudansa.
”
Kona-ba presu, ha’u hato’o ona ba Ministru Agrikultura, sira sei mantein ho dekretu-lei númeru 15 ne’e nafatin. Sentru Lojistika Nasionál mós sosa hanesan ho ita, ita mak ba sosa iha agrikultór sira-nia uma nia folin sentavu $0,50 maibé sira mak lori mai ne’e folin sentavu $0,40. Maibé, iha Maliana, ita mak ba foti de’it sira la lori mai,so hanesan Kailaku sira-ne’e mak sira rasik lori mai,” nia dehan.
Agrikultór Maliana, Alberto Lopes de Jesus, sentf kontentei no satisfas ho presu ne’e tanba presu sei nafatin hanesan iha anterior ne’e.
“Ha’u faan karon 20, tinan-tinan ha’u sempre faan iha ne’e, presu nafatin. Tanba ita presiza entaun hakarak lakohi tenke faan. Ohin loron, ami hetan osan uituan ne’e hodi sustenta familia no servisu seluk,” nia dehan.
Diretór Seguransa Alimentár Autoridade Munisípiu Bobonaru, Rui Manuel Lasi, husu ba agrikultór sira ne’ebe dadaun ne’e sei iha faze kolleta hare atu asegura hare-kulit iha fatin seguru, nune’e bele garante ninia kualidade.
Nia hato’o rekomendasaun ne’e tanba konsumidor sira iha merkadu lokál no nasionál gosta konsumu foos-rai Maliana ne’ebe ho isin-tomak no moos.
“Hare ne’ebé mak ita-boot sira oferese mai CAAKUB ne’e, depois ita sei distribui ba loja sira iha Dili ne’ebé identifikadu ona. Ita labele hanoin de’it mak osan, ita tenke hanoin mós ita-nia kualidade foos. Asosisaun ne’e ita-nian, osan mós ita-nian, ita sosa atu fasilita ita-boot sira, entaun ita tenke asegura hare-kulit para ita mós garante foos nia kualidade. Tanba, ita nia fous-rai, ita distribui ba merkadu dezde 2022 to’o agora laiha problema. Ita-nia fóos ne’e,ita konsumedór sira gosta han foos ida Tomak ne’e,” nia hateten.
Enkuantu, iha tinan ne’e, CAAKUB planeia sosa hare-kulit tonelda 250 husi grupu agrikultór 28 ho membru 300-resin, maibé la taka dalan mós ba agrikultór sira-ne’ebé la’ós membru husi ssosisaun ne’e.
Notísia Relevante : CAAKUB sei distribui foos tonelada 50 ba Sentru Lojístika Nasionál
Jornalista : Sergio da Cruz
Editór : Cancio Ximenes
