DILI, 10 Juñu 2025 (TATOLI) – Embaixadór Japaun iha Timor-Leste, Tetsuya Kimura, akompaña reprezentante empreza japoneza Tsuneishi Shipbuilding hodi atualiza progresu serbisu kona-ba investimentu iha indústria konstrusaun navál iha Manatutu, ba Primeiru-Ministru, Xanana Gusmão.
Embaixadór Japaun Tetsuya Kimura hateten iha sorumutu ne’e hetan akompañamentu mós husi Ministru Transporte no Komunikasaun, Miguel Manetelu, hodi atualiza dezenvolvimentu husi serbisu sira, ne’ebé empreza ne’e mós harii ona sira-nia kompañia lokál iha Timor-Leste.
Nia esplika katak Tsuneishi rasik loke tiha ona nia edifísiu iha Timór no hahú ona kontrata funsionáriu timoroan sira no daudaun serbisu hamutuk ho sira na’in-42, inklui projetista dezeñadór ró nian hamutuk 37.
“Metade husi númeru funsionáriu sira-ne’e balun komesa tiha ona serbisu ho Tsuneishi iha tinan kotuk. Sira serbisu ba dezeñu ró nian rasik. Formandu na’in-10 hahú tiha ona sira-nia estájiu iha Kuartél Jerál Tsuneishi nian iha Japaun, no fulan-Jullu agora sei haruka tan estajiáriu na’in-11”, Tetsuya Kimura informa iha Palásiu Governu, ohin.
Nia esplika kona-ba projetu konstrusaun ró ida-ne’e daudaun empreza sei halo hela estudu viabilidade ba estaleiru nian atu determina fatin ba konstrusaun nian depois empreza sei halo negosiasaun detallu ho Governu hafoin hahú obra.
Iha fatin hanesan, Ministru Transporte no Komunikasaun, Miguel Manetelu, hateten primeiru-ministru fó apresiasaun ba planu konstrusaun ró iha Timór no ministériu ne’ebé tutela prontu atu akompaña to’o konstrusaun ne’e hahú.
“Ida-ne’e investimentu privadu, ne’ebé primeiru-ministru apresia ba projetu ne’e. Hanesan Governu ita prontu atu apoiu la’ós de’it MTK, maibé mós husi parte justisa nian tanba aban bainrua estudu viabilidade ne’e identifika fatin loloos ida ne’ebé atu konstrui ró ne’e, Ministériu Justisa liuhusi Terra Propriedade mak sei atribui rai ne’e ba kompañia, konserteza liuhusi kontratu ida”, dehan.
Iha biban ne’e mós Embiaxadór Japaun, Tetsuya Kimura, hato’o parabéns ba xefe Governu, kona-ba desizaun koletiva líder ASEAN sira-nian, ne’ebé admite Timor-Leste nu’udar Estadu-membru ASEAN da-11 iha fulan-Outubru tinan ida-ne’e. Hato’o kongratulasaun mós kona-ba selebrasaun susesu Semana Mundiál Oseanu nian iha 2025.
Aliende ne’e introdús livru ho imajen ba labarik sira-nian ba primeiru-ministru no livru ida-ne’e ilustra narrativa ida kona-ba konxiénsia ambientál nian, ne’ebé prodús husi voluntáriu JICA sira-nian.
Notísia relevante: Empreza Tsuneishi propoin investimentu millaun $300 no kampu serbisu ba ema 4.000
Jornalista: Arminda Fonseca
Editora: Maria Auxiliadora
