VIKEKE, 17 juñu 2025 (TATOLI)-Sekretariu Estadu Kooperativa (SEKoop) oferese formasaun diversifikasaun ba membru kooperativa sira oinsá utiliza produtu lokál hanesan ai-farina, fehuk-midar, no bafo Kay Rala ba dose.
Koordenadór SEKoop munisípiu Vikeke, Albino da Costa Guterres, haktuir objetivu husi formasaun ne’e atu aumenta koñesimentu ba membru sira hodi komersializa produtu lokál ba merkadu.
Kada membru ida husi kooperativa sira ne’ebé partisipa iha formasaun ne’e mak Lanahas, BFF, CCTM, Hamaifor, HFF no Kooperativa Maresbi.
“Ho formasaun sira-ne’e, ba oin ita-nia kooperativa bele kuda bafo hanesan ai-han ne’ebé ho nutrisaun, bele troka foos. Tanba ne’e, liuhusi formasaun sira-ne’e bele motiva kooperativa sira hasa’e valór produtu lokál hodi komersializa ba merkadu, reforsa ekonomia kooperativa sira nian”, nia dehan ba TATOLI iha ninia knaar fatin, Vikeke Vila, ohin.
Albino dehan, daudaun ne’e SEKoop implementa programa pilotu kuda bafo iha postu Lakluta hamutuk ektare hitu, foin lalais kolleta kilógrama 7.009.
“Nune’e ami hein hela MOKATIL hodi prepara ba fini. Tuir planu fini bafo ne’e sei distribui ba postu lima atu grupu agrikultór sira kuda”, nia realsa.
Iha fatin hanesan reprezenta Kooperativa Hamaifor, Maria Virginia Soares, agradese ba formasaun ne’ebé oferese husi SEKoop.
“Formasaun ne’e benifisia tebes ba ami kona-ba uza produtu lokál hodi prodús ba dose. Maske formasaun ne’e loron rua, maibé sufisente ona ba ami”, dehan nia.
Nia husu ba SEKoop atu kontinua sira-nia programa formasaun, atu reforsa ekonomia kooperativa sira ne’ebé eziste iha minisípiu Vikeke.
Notísia relevante: SEKooP: Setór kooperativa fó kontribuisaun ba dezenvolvimentu ekonomia
Jornalista : Vitorino Lopes da Costa
Editora : Rita Almeida
