BOBONARU, 18 Juñu 2025 (TATOLI)–Empreza lokál Lesuburo unipesoál Lda no Devita Group, hahú implementa projetu morru protesaun ho naruk kilómetru ida resin, iha mota Bubolu, suku Meligo, postu administrativu Kailaku, munisípiu Bobonaru.
Projetu ne’e implementa ho objetivu atu satán bee-mota Bulobu hodi proteje komunidade nia to’os ne’ebé liu rai-natar iha área Haurema, Mautalo no Raeana inklui proteje mós estrutura ponte Bulobu no ponte Pakistan.
Enjiñeiru empreza Lesuburo, Octaviano Marçal Soares, hateten, tuir loloos obra ne’e implementa iha loron 11 Marsu maibé la konsege no foin mak implementa iha fulan ne’e tanba udan la fó biban.
“Tipu prinsipál projetu ne’e mak gabiaun (bronjong) ami-nia ne’e ho distánsia metru 490, semana uluk ami hahú hamoos, depois segunda ne’e ami hahú kee, agora to’o metru 10,” Octaviano Marçal informa ba Jornalista sira iha terrenu, Kuarta ne’e.
Notísia Relevante : Korrente mota kontinua sobu ponte ligasaun Cailaco-Maliana
Enjiñeiru garante katak empreza Lesuburo sei finaliza obra ne’e tuir tempu ne’ebé mak determina ona.
“Ha’u hanoin tanba serbisu ne’e iha fatin de’it, entaun ami sei finaliza tuir tempu, tanba tempu mós fó ami atubele halo serbisu over husi oras ne’ebé mak ami iha,” nia akresenta.
Iha sorin seluk, Xefe suku Manapa, Jeferino Loco Berre, agradese ba Ministeriu Obra Públika (MOP) no konsidera obra ne’e bele proteje rai produtivu ba agrikultura no ponte.
Maski nune’e, nia preukupa no kestiona kona-ba dezeñu ne’ebé ekipa Enjiñeiru MOP prodús ba obra ne’e.
“Tuir loloos bainhira enjiñeiru sira husi nasionál karik atu halo dezeñu ne’e tenke konsulta ho suku Meligo no Manapa ne’ebé hela besik iha lokál projetu, loloos nia husi bronjong tuan ne’e sa’e bá loos de’it, labele sikun sai tia mak sikun tama fali, ita halo bronjong ne’e atu halo klo’ot mota, agora ne’e la’e, halo luan tan fali, entaun nia sei kontinua fó impaktu ba natar tanba mota ne’e tinan-tinan volume boot,” nia tenik.
Notísia Relevante : Ponte Bulobu ligasaun Cailaco-Maliana ameasa atu kotu
Abitante lokál, António Maia de Jesus, preokupa no kestiona kona-ba dezeñu ba obra ne’e tanba projetu ne’e konsege haluan mota no sakrifika rai produtivu seluk.
“Mota la luan hanesan ida, tanba udan beibeik depois morru laiha bee mai okupa tia natar, nune’e fatin balun ne’e mak ita haree hanesan mota, maibé tuir loloos natar fatin sira mai sukat ne’e bá liu kotuk. Entaun rai ida oin luan boot iha fali mota-laran tanba morru iha kotuk tia ona, ne’ebé agora sira halo mota mak luan maibé rai natar fatin mak klo’ot fali, ne’e ita atu salva natar ka oinsá, rai ektare lubuk ida mak iha tia mota laran,” nia hato’o.
Obra ne’ebé empreza Lesuburo Unip, Lda ezekuta ho valór orsamentu $521.97,03 no Devita ho valór kontratu $618.618,22 no durasaun tempu to’o novembru 2025.
Jornalista : Sergio da Cruz
Editora : Julia Chatarina
