BAUKAU, 23 Juñu 2025 (TATOLI)–FALINTIL-Forsa Defeza Timor-Leste (F-FDTL), segunda ne’e, festeja loron aniversáriu Komponente Aérea Lijeira ba dahaat.
Xefe Estadu Maiór Jeneràl F-FDTL, Tenente Jenerál Falur Rate Laek, hateten liuhosi selebrasaun aniversáriu referidu, husu atu membru hotu halo reflesaun ba valór hotu iha tempu atuál hanesan hasa’e konxiénsia kona-ba importánsia husi komponente estratejiku forsa armada nian.
“Kriasaun Komponente Aérea marka momentu krusiál ida iha ita-nia forsa armada, hodi reforsa ezisténsia no atividade atu hatán ba dezafiu sira-ne’ebé ita hasoru. Imi tenke sente urgullu,” Xefe Estadu Maiór hateten iha Aeroportu Lanud, Baukau.
Tenente Jenerál Falur husu membru sira iha Komponente Aérea nafatin hatudu abilidade no determinasaun nune’e iha espíritu serbisu ne’ebé define iha F-FDTL liuliu ba membru sira-ne’ebé envolve dahuluk ba kriasaun Komponente Aérea tanba sai fundasaun ba dezenvolvimentu.
Falur konsidera, liuhosi selebrasaun aniversáriu referidu nu’udár dalan hodi hateke ba futuru no hatán ba dezafiu sira, nune’e husu Governu kontinua fó-atensaun no rekoñese ba papél krusiál ne’ebé Komponente Aérea hala’o liuliu bele asegura seguransa no soberania nasaun Timor-Leste.
“Komponente Aérea Lijeira ho palestra ida, husi rai to’o lalehan konsolida vizaun F-FDTL. Atividade pedagójika ida-ne’e fó importánsia hodi diskute no aprende husi peritu sira aviasaun nian kona-ba pratika seguransa semo,” Tenente Jeneral Falur subliña.
Iha fatin hanesan, Ministru Defeza Kontra-Almirante, Donaciano da Costa “Pedro Klmar Fuik” parabeniza Komponente Aérea Lijeira ne’ebé selebra aniversáriu ba dahaat, no konsidera parte husi konstitui ba forsa armada ne’ebé iha progresu no importante ba soberania Timor nian.
“Polítika forsa armada Timor-Leste nian bele dezenvolve ho modelu hanesan pratika internasionál. Hafoin tinan 23 transformasaun, ohin ita bele selebra Komponente Aérea ba dahaat,” Pedro Klamar Fuik hateten.
Entretantu, F-FDTL Komponente Aérea Lijeira harii iha 23 Juñu 2021, ne’ebé ho misaun no funsaun atu asegura soberania aérea nian iha Timor-Leste.
Iha selebrasaun aniversária ba dahaat ne’e partisipa husi Ministru Defeza Donanciano Costa Gomes, Eis Prezidente RDTL, Jenerál Taur Matan Ruak, Tenente Jenerál Reformadu, Lere Anan Timur, Xefe Estadu Maiór F-FDTL, Tenente Jenerál Falur Rate Laek, Prezidente Autoridade Munísipiu Baukau, Veneranda Lemos Martins no konvidadu sira seluk tantu sivíl no militár.
Jornalista: Natalino Belo
Editór: Xisto Freitas da Piedade
