DILI, 26 Juñu 2025 (TATOLI) – Ministru Transporte no Komunikasaun (MTK), Miguel Manetelu, iha ámbitu sorumutu ho reprezentante Banku Dezenvolvimentu Aziátiku (BAD) iha Kuartél Jerál BAD, iha Manila-Filipina, iha 24 Juñu 2025, hato’o agradesimentu ba banku ne’e tanba apoia ona dezenvolvimentu setór transporte públiku iha Timor-Leste.
“Onra no priviléjiu ida mai ami, iha fatin ne’e, agradese ba BAD nia apoiu ba dezenvolvimentu transporte públiku iha Timor-Leste, hahú ho Planu Mestre Transporte Nasionál no haluan liuhusi estudu viabilidade. Ida-ne’e sai hanesan viajen ida ne’ebé signifikante no estratéjiku ba ita, no BAD nia parseria sai hanesan instrumentál”, Miguel Manetelu hateten iha nota imprensa ne’ebé Tatoli asesu, ohin.
Governante ne’e dehan kona-ba dezenvolvimentu transporte públiku iha Timor-Leste, hanesan antes ne’e nia parte ko’alia ona ho Diretora-Ezekutiva BAD, Stefania Dina, ho ekipa rejionál iha Dili, katak Governu Timor-Leste nafatin iha kompromisiu no foti nia responsabilidade atu avansa ho Dezenvolvimentu Enjeñaria Detalladu (DED).
Hafoin remata tiha DED hakarak envolve BAD iha diskusaun seluk kona-ba opsaun finansiamentu potensiál sira.
Tuir nia, durante enkontru ho Diretora Stefania no ekipa rejionál iha Dili, husu katak bele hetan finansiamentu ba inisiativa ida-ne’e iha BAD nian ba tinan oin mai, ne’ebé sei remata DED.
“Ha’u kontente atu fó-hatene ba imi katak, Termu Referénsia (ToR) ba DED hetan ona aprovasaun formál hodi submete ba prosesu aprovizionamentu. Preparasaun sira ne’e la’o daudaun ona atu hahú aprovizionamentu iha inísiu Jullu tinan ne’e no hein katak DED sei remata iha Marsu ka fulan Abríl tinan 2026”, nia dehan.
Nia haktuir dezenvolvimentu sistema transporte públiku modernu ida-ne’e reprezenta barak liu fali mobilidade ne’ebé di’ak liu, ida-ne’e hanesan investimentu estratéjiku ida iha kreximentu ekonómiku inkluzivu, integrasaun nasionál no dezenvolvimentu sustentavel.
Ida-ne’e hala’o papél krítiku ida hodi promove modernizasaun infraestrutura no asegura prestasaun servisu sustentavel no ekuitativu ba povu.
Iha sorumutu ne’e Manetelu mós halo enkontru ho dirijente sira husi BAD nian hodi ko’alia kona-ba setór transporte públiku no aéreu nian, dezenvolvimentu ekipamentu iha transporte públiku no aéreu ne’ebé nia fonte orsamentu husi BAD atu halo konstrusaun aeroportu iha nasaun sira iha rejiaun Ázia no Pasífiku hanesan Mongólia no Filipina.
“Ami hein atu rona BAD nia perspetiva kona-ba pasu sira tuirmai no reforsa ami-nia prontidaun atu mantein momentu no avansa servisu importante ida-ne’e hamutuk”, konklui.
Lembra katak MTK hamutuk ho BAD lansa ona, iha Maiu 2024, Planu Mestre Transporte Públiku Timor-Leste (PMTPTL).
Objetivu husi lansamentu PMTPTL mak atu fasilita Timor-Leste atu compete hodi sai país atrativu ne’ebé iha transporte públiku asesivel, inkluzivu no prepara ba futuru hodi apoiu kreximentu ekonómiku, dezenvolvimentu urbana no kualidade vida.
Notísia relevante: MTK no ADB lansa Planu Mestre Transporte Públiku Timor-Leste
Jornalista: Arminda Fonseca
Editora: Maria Auxiliadora
