DILI, 03 Jullu 2025 (TATOLI)-Koordenadór Gabinete Avaliasaun Lisensiamentu Akreditasaun (GALA), António Tomás Maia, informa to’o agora ekipa GALA kontinua halo avaliasaun ba infraestrutura eskola internasionál sira.
“Ami sei monitoriza nafatin, karik ita nafatin hetan erru ruma, rekomenda atu hadi’a, se la hadi’a maka halo suspensaun”, dehan nia ba TATOLI iha nia knaar fatin Vila Verde, kinta ne’e.
Nia esplika notifikasaun ne’e mensiona data determinasaun hodi haree ba kestaun sira ne’ebé GALA mensiona hanesan infraestrutura no formasaun profisionál ba professór sira. Tanba, faze akompañamentu to’o fulan-Dezembru.
Nia dehan eskola sira ne’ebé hetan ona lisensiamentu mak parte GALA halo notifikasaun hodi hadi’a dezempeñu.
Koordenadór GALA esplika avaliasaun bazeia ba padraun tolu mak infraestrutura no fasilidade, pedagójika, no jestaun eskolár.
Kada padraun iha nia kritériu, kuandu estabelese eskola ida tenke iha fasilidade, nune’e ema neʼebé eskola bele garantidu no seguru, saudável no equitável.
“Kuandu la prienxe, ita halo rekomendasaun hodi kompletam, nafatin la kompleta foin foti sansaun taka eskola”, nia esplika.
Daudaun iha eskola hamutuk 1.800-resin ne’ebé hetan ona lisensiamentu husi tinan 2015 to’o 2023 ba nível eskolaridade iha territóriu.
Entretantu eskola Rainha da Paz estabelese iha 2002, hetan ona akreditasaun hosi GALA.
Notísia relevante: ME notifika ona eskola ne’ebé nia infraestrutura la adekuadu
Jornalista : Osória Marques
Editora : Rita Almeida
