OEKUSI, 13 Abríl 2026 (TATOLI) – Ministériu Edukasaun (ME) serbisu hamutuk ho Organizasaun Mundiál Saúde (OMS), segunda ohin, realiza formasaun ba inspetór eskolár na’in-12 iha Rejiaun Administrativa Espesiál Oekusi Ambeno (RAEOA) kona-ba ferramenta avaliasaun ba eskola seguru.
Notísia relevante:Edukasaun Oekusi sei halo auditória ba ezekusaun fundu konsesaun eskolár
Sub-Inspetór Administrasaun Eskolár iha Ministériu Edukasaun, Rudolfo Ricardo Aparício, informa, objetivu husi formasaun ne’e, atu haforsa koñesimentu inspetór sira atu halo monitorizasaun fiskalizasaun no investigasaun ba serbisu ezekutivu nian.
“Formasaun indusaun ohin ne’e, ho sira-nia item atu kontrola iha fiskalizasaun monitorizasaun ho materia prinsipál 34 sei aprende durante formasaun ne’e, no inspetór sira mós presiza halo formatu fiskalizasaun no investigasaun, nune’e bele kontinua eziste iha sira-nia serbisu fatin,” nia hateten iha salaun edukasaun Oekusi, ohin.
Notísia relevante:Edukasaun Oekusi estabelese klase paralela EBC Mekosikaloti iha aldeia Noque
Iha biban ne’e, Diretór Diresaun Edukasaun no Solidariedade Sosiál iha Oekusi, Vincêncio Cono, agradese tanba liuhusi formasaun ne’e bele halo nafatin indusaun ba serbisu inspesaun edukasuan nian iha Oekusi.
Nune’e bele haforsa tan monitorizasaun fiskalizasaun investigasaun prevensaun verifikasaun no aváliasaun iha eskola, tanba papél hirak-ne’e, sei hatuur iha relatóriu idaidak.
“Iha relatóriu mak balun sei la’o sala presiza iha auditoria, tanba eskola atu seguru ita presiza kria kondisaun, seguru iha parte fíziku no non-fíziku,” nia hateten.
Nia esplika, kona-ba naun-fíziku maka konsiénsia, sentimentu ba perténsia papél nu’udar manorin no dirijente eskola liliu nu’udar timorense. Fasilidade sira ba fíziku hanesan manuál kuríkulu apoia modulu ba profesór sira atu hanorin, planu lisaun ne’ebé elaborada husi Ministériu Edukasaun ba ensinu báziku no formasaun presiza sensibiliza atu hakle’an nafatin koñesimentu atu hatene papél nu’udar manorin no dirijente eskola ho nia administrasaun sira.
Notísia reelvante:Edukasaun Oekusi estende kontratu funsionáriu na’in-263 inklui profesór 51
Estretantu, totál eskola sira iha RAEOA hamutuk 103, komposta husi Ensinu Pré-Eskolár (EPE) 16 Ensinu Báziku Sentrál (EBC) inklui nia filiál sira hamutuk 80, Ensinu Sekundáriu Jerál (ESG) haat no Ensinu Tékniku Vokasionál (ETV).
Jornalista: Abílio Elo Nini
Editór: Rafael Ximenes de A. Belo
