Dom Virgílio: “Lú Olo hadomi povu hodi sakrifika an ba povu no nasaun ho fuan”

DILI, 08 Agostu 2026 (TATOLI)—Arserpispu Arkidioseze Mertropolitana Dili, Dom Virgílio Kardeál do Carmo da Silva, SDB, konsidera saudozu Francisco Guterres Lú Olo nu’udar figura ezemplár ba familia no banasaun.

Notísia Relevante: Adeus Estadista Umilde no Onestu, Adeus Grande Eroi Lú Olo..! 

Saudozu Lú Olo hatudu ona legadu ida-ne’ebé boot tebes ba nia família no nasaun tanba durante nia moris hahú husi joven ne’e nia halo rezisténsia hodi luta kontra invazór tanba ba nasaun no povu ida ne’e.

Tuir nia, to’o mai iha indepénsia ne’e saudozu Lú Olo nafatin dedika an hodi kontribui ba prosesu konstrusaun Estadu no nasaun hahú asume Prezidente Parlamentu Nasionál, Prezidente Repúblika no Prezidente Partidu, ida-ne’e hatudu nia domin nafatin ba povu no nasaun ida ne’e liuhusi ezerse funsaun sira-ne’e.

“Fuan boot hadomi nia rai ida-ne’e. Lú Olo nia legadu sira-ne’e mak sei kontinua iha família no povu nia fuan saida mak nia halo ba familia no nasaun. Lú Olo hadomi nia povu hodi sakrifika nia an ba povu ho nasaun ho fuan,” Dom Virgílio Kardeál do Carmo da Silva hateten liuhusi omilia bainhira prezide misa agradesimentu loron 40 ba falesimentu Saudozu Antigu Prezidente Repúblika, Francisco Guterres Lú Olo, iha Igreja Katedrál, Dili, ohin.

Nai Lulik Salesiano ne’e hateten, Saudozu Lú Olo la’ós de’it figura ne’ebé hadomi nia familia no hadomi de’it nasaun no povu ida-ne’e, maibé Saudozu Francisco Guterres Lú Olo mós hakbesik an b Maromak liuhusi fiar ne’ebé nia iha.

“Durante ne’e saudozu lori nia familia mai misa iha tempu domingu,” nia hateten.

Nia lembra hikas,  iha momentu saudozu sei asume kna’ar hanesan Prezidente Repúblika ne’e iha kalan vijilia paskál nia ho espoza mak lee leitura, maibé iha momentu ne’ebá eletrisidade mate nune’e halo seguransa sira pániku, maibé saudozu la pániku maske iha situasaun ne’ebé pániku.

Dom Virgilio Kardeál hateten, haree ba legadu sira-ne’ebé mak saudozu rai hela husu hotu-hotu tenke banati tuir saida mak saudozu halo ona ba família no povu ida-ne’e.

Entretantu, Espoza husi Saudozu Antigu Prezidenet Repúblika Francisco Guterres Lú Olo, Cidalia Mouzinho Nobre Guterres, iha nia intervensaun hateten ho falesimentu Saudozu Francisco Guterres Lú Olo nia midar momentu tristeza boot ba iha familia liuliu hanesan ha’u ne’ebé nu’udar espoza no oan sira hotu.

“Falesimentu Saudozu Francisco Guterres Lú Olo nian mak nu’udar momentu defisil ida mai ami. Durante ne’e ami sente katak ami la la’o mesak, ita-boot sira-nia prezensa, orasaun, liafuan, amizade, domin no solidaridade fó forsa ba ami hodi kontinua hamriik no la’o ho esperansa,”  nia dehan.

Tanba ne’e, nia hato’o agradesimentu ba povu Timor-Leste tomak ne’ebé durante ne’e hato’o sentidu kondolénsia hahú husi Saudozu Francisco Guterres Lú Olo nian falesimentu to’o ohin loron.

Iha biban ne’e, Saudozu Francisco Guterres Lú Olo nia espoza mós hato’o agradesimentu ba Arsebispu Arkidioseze Mertropolitana Dili, Dom Virgílio Kardeál do Carmo da Silva, amo sira ne’ebé disponibiliza ona tempu hodi prezide Missa Agradesimentu ba loron 40 ba falesimentu Saudozu Francisco Guterres Lú Olo nian.

Nia mós agrasede ba iha entidade oioin hanesan orgaun sobrenia haat Prezidente Repúblika, Parlamentu Nasionál, Governu no Tribunál, ne’ebé sempre apoia familia iha tiste hahú husi Saudozu Francisco Guterres Lú Olo nian mate to’o serimóan loron haat nulu nian.

Agrasede ba korpu diplomátiku sira-ne’ebé mak rezidente no la rezidente inklui Timor-Leste nian reprezentante misaun Diplomatiku iha rai-li’ur ne’ebé fó apoiu solidariedade ba família enlutada hahú husi falesimentu Saudozu Francisco Guterres Lú Olo nian.

Nia mós lori familia hato’o agradese ba veteranu no kompatriota rezisténsia sira hotu inklui kámada oin oin ne’ebé durante ne’e sempre fó apoiu morál ba família sira.

Entretantu hodi hanoin hikas falesimentu Antigu Prezidente Repúblika Francisco Guterres Lú Olo hala’o ho kalan reflesaun, misa agradesimentu ne’ebé hala’o iha Igreja Katedrál Dili, no hafoin ne’e família hamutuk entidade no komunidade sira ba  karii ai-funan iha Saudozu Francisco Guterres Lú Olo nia rate iha Jardín ba Eroi iha Metinaru-Dili.

Notísia Relevante: Lú Olo estadista ne’ebé hatudu responsabilidade ba Estadu

Jornalista : Natalino Costa

Editór        : Cancio Ximenes