OEKUSI, 06 Janeiru 2026 (TATOLI) – Diresaun Rejionál Edukasaun no Solidariedade Sosiál, Rejiaun Administrativa Espesiál Oekusi Ambeno (RAEOA) deside estabelese klase paralela husi Ensinu Báziku Sentrál (EBC, sigla portugés) Mekosikaloti iha aldeia Noque suku Naimeko sub-rejiaun Pante Makasar.
Diretór Diresaun Rejionál Edukasaun no Solidariedade Sosiál, Vincêncio Cono, esplika, fundamentu husi estabelesimentu klase paralela ne’e, ho objetivu atu fasilita estudante sira hodi asesu eskola ho distánsia besik.
Tanba durante ne’e, estudante sira obrigatoriamente tenke la’o dook ho distánsia kilometru 25 husi aldeia Noque atu asesu ensinu apresizajen iha EBC Mekosikaloti lokaliza iha aldeia Baqui suku Naimeko.
“Ita foin daudaun delibera ona klase paralelu sétimu ano atu prevene estudante abandona eskola no kaben sedu no mós prevene estudante la’o kilometru 50 kada loron, tanba dadersan husi Noque no Oélulan ba EBC Mekosikaloti kilometru 25, depois fila-fali mai uma, tan ne’e ita deside loke nia paralelu ida atu fasilita estudante sira hodi asesu ho distánsia besik, no iha futuru liuhusi avalizasaun ita sei koloka nesesidade sira tantu rekursu umanu, materiál didátiku, materiál eskritóriu no mós materiál konstrusaun balun,” nia hateten, hafoin hala’o vizita ohin.
Notísia relevante: https://tatoli.tl/2024/06/14/ministeriu-edukasaun-lansa-programa-alma-iha-oe-cusse
Ezekutivu edukasaun rejionál ne’e lembra, bainhira atu viajén atu hala’o vizita iha fatin turístiku reliojioza Nossa Senhora Leolbatan, observa estudante sira bainhira sai husi eskola, balun tenke selu ojek, balun la’o oin ho kondisaun kolen no hamlaha.
“Tan ne’e ita tenke muda situasaun ne’e, edukasaun deside atu estudante sira iha direitu tomak hodi goza eskola paralelu, agora daudaun ita rekruta hela profesór na’in-tolu hanorin ho provizoriamente, no tempu tuirmai ita sei fornese mobiliáriu meza, kadeira inklui kuadru hakerek no seluktan, tanba iha armazen sufisiente atu fornese,” nia hateten.
Xefe Suku Naimeko Marcos Liu, konsidera ho estabelesimentu klase paralela, responde ona preokupasaun estudante no no inan-aman sira husi aldeia Bonemese no aldeia Noque, tanba tinan barak, autoridade lokál rekmenda beibeik ona.
“Apresia ba diresaun edukasaun tanba tinan ne’e estabelese EBC ida iha suku Naimeko maske paralelu hela maibé responde duni ona sira, no inan-aman husi aldeia rua nia halerik, atu bele asesu eskola ho besik. Ida-ne’e preokupasaun boot tebes, durante ne’e ami rekomenda beibeik maibé nunka responde, maibé grasa boot tinan ne’e bele rezolve ona, no ohin tama ona aula ba loron daruak nian, hanesan autoridade suku prontu koopera atu buka rai no oferese, importante ba nesesidade povu nian,” nia orgullu.
Gregorio Neno Abi, nu’udar responsavel klase paralelu EBC Mekosikaloti, relata katak daudaun ne’e rejista ona estudante na’in-36, prontu atu hala’o aprendizajen.
“Ami tama horseik tanba bazeia kaléndariu edukasaun nian. Ohin ami tama loron rua ona, maibé estudante iha ona 36, ne’ebé rejistrasaun ne’e sei kontinua la’o. Ami garante katak sei to’o na’in-100 tanba barak mak seidauk mai rejista tanba iha informasaun negativu balun katak eskola ne’e seidauk loos, maibé agradese tanba hosi edukasaun bele mai vizita no promete duni atu fornese fasilidade,” nia hateten.
Notísia relevante: https://tatoli.tl/2025/01/17/edukasaun-raeoa-konsege-utiliza-fundu-konsesaun-eskolar-hodi-hadia-eskola-sira
Entretantu observasaun Jornalista Ajénsia Tatoli, I.P, nota katak, daudaun ne’e komunidade sira voluntariamente konstrui ona edifísiu provizóriu ba estudante sira iha bairru Nubani aldeia Noque suku Naimeko.
Jornalista: Abílio Elo Nini
Editór: Rafael Ximenes de A. Belo
