DILI, 03 Jullu 2025 (TATOLI)-Vise-Primeiru Ministru, Ministru Koordenadór Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, introdús pilár importante haat ba estudante sira atu banati.
“Pilár haat importante mak konstrusaun ba pás ne’e maihusi rezisténsia, ida fali konstrusaun Estadu, konstrusaun nasaun, no ikus liu konstrusaun karakter”, dehan nia ba estudante eskola sekundáriu jerál Finantil iha Aimutin, kinta-ne’e.
Nia dehan bainhira ita konstrui ona mak presiza konsolida, presiza armoniza atu bele sai util ba Nasaun no Estadu no ba ema tomak, katak faze konstrusaun remata, faze konsolidasaun, para bele sustentável atu kontinua nafatin ba oin ho di’ak.
Vise PM dehan sé de’it mak estuda, aprende, no presiza esforsu hodi haka’as-an iha disiplina, para nafatin hanesan asuwain. Nune’e apela ba estudante sira atu aproveita oportunidade hodi estuda, tanba inan aman esforsu maka’as buka osan, sira hakarak imi eskola matenek, para haree fali sira no haree nasaun ne’e ba futuru.
“Maibé importante mak tenke respeita imi-nia manorin sira, tanba manorin sira mak asuwain, imi sai deputadu, sai prezidente no saida de’it, rezultadu husi manorin ida, manorin ida ne’ebé forma imi. Hetan previlejiu liu iha rai ida-ne’e mak edukasaun no saúde, tanba ne’e la iha razaun ida dehan tenke tuir iha kadeira mak estuda, maibé vontade mak halo matenek, la’os tanba dehan tenke ba eskola iha rai liur”, Assanami enkoraja.
Nia adianta estudante tenke hatene jere, tanba to’o tempu ida nasaun ne’e iha imi nia liman, labele dependente de’it ba lider sira agora, maibé to’o loron ida sira sei husik nasaun ne’e ba foinsae sira-nia liman.
Diretor eskola Fitun Naroman Timor-Leste (FINANTIL), Aniceto Berlelo, husu ba Mariano Assanami Sabino, atu kontinua ho diálogu ne’e ba eskola hotu iha teritoriu nasionál.
“Tanba ita-nia joven sira hanesan estudante, atu bele halakon konflitu sira ne’ebé mosu beibeik iha eskola sira”, Aniceito Berlelo hatete iha ninia diskursu.
Nia dehan liuhusi diálogu ne’e bele muda estudante nia karakter brutalismu sira. “Ita-nia joven sira ne’ebé sai hanesan na’in ba problema, oinsá forma fali sira-nia karakter, liu-liu liga liu ba pás, oinsá sira atu hadok-an husi konflitu. Entaun ho diálogu sira hanesan ne’e tenke kontinua, atu reforsa ita-nia oan sira nia hanoin”.
Iha fatin hanesan Diretór Ensinu Sekundáriu Jerál, Benjamin Fernandes, informa diálogu ida-ne’e koko oinsá atu bele redús konflitu estudante ho estudante iha Dili laran.
“Ami sei halo diálogu ba eskola hirak ne’ebé identifika sempre iha konflitu, ho ida-ne’e atu hamenus konflitu”, nia dehan.
Nia akresenta diálogu ne’e sira foka liu ba eskola 10 dezembru, ESJ Finantil, ESJ númeru 4 setembru no eskola Nobel da Paz.
“Tanba dalabarak ita rona eskola 4 ne’e mak mosu konflitu hela de’it. Meiu seluk ami halo ona, HADESTA fó ona formasaun ba sira, kona-ba oinsá atu hamenus konflitu maibé nafatin”, nia esplika.
Benjamin hatutan, bainhira diálogu sira ne’e hotu sira sei halo fali avaliasaun, diálogu ne’e nia rezultadu halo nusa, hein rezultadu ba oin foin hatene.
“Se laiha ME nafatin esforsu ho parte ne’ebé de’it, atu koko hamenus, tanba konflitu ne’e entre fuan ba fuan, tanba ne’e presiza diálogu mak barak, la’os kastigu mak barak, ME ami la uza buat ida kastigu, ami uza diálogu no meiu seluk atu bele redus konflitu”, nia akresenta.
Notísia relevante: Estudante presiza kuda dimensaun haat ba dezenvolvimentu edukasaun iha futuru
Jornalista : Osória Marques
Editora : Rita Almeida
